Imajem : Konfrontu ne’ebe akontese iha postu administrativu Cailaco, Munisípiu Bobonaro, 20/05/2025
SAPNewsTL, Bobonaru : Iha ámbitu loron 20 Maiu, komemorasaun independénsia Repúblika Demokrátika Timor-Leste (RDTL) ba dala XXIII ne’ebé hala’o iha Postu Administrativu Cailaco mosu konfrontu rezulta joven mane ida hetan tiru husi Polísia Nasionál Timor-Leste (PNTL), ikus mai Ronaldinho da Costa Ximenes lakon vida.
Marciana Da Conceição – SAPNews
Tuir informasaun ne’ebé SAPNews asesu liu hosi fontes kredivel ida informa katak mosu duni desintendimentu iha postu Cailaco, Bobonaru. Hafoin tuda malu no duni malu entre parte rua, halo komunidade sira halai namkari tanba pániku.
Durante desintendimentu, parte PNTL ne’ebé presente iha fatin akontesimentu, halo kedas intervensaun ba kazu refere no tiru kanek joven mane ida no kanek iha hirus-matan rezulta ran sai makaas.
Hafoin akontesimentu, Ronaldinho da Costa Ximenes sofre kanek iha hirus-matan parte liman-los ne’e, hetan apoia no lori kedas ba sentru saúde Cailaco maibe kondisaun todan entaun transporta ona ba Munisípiu Bobonaru hodi halo tratamentu maibe minutu ikus la konsege salva nia vida tanba grave.
Maske mosu konflitu, maibe ho presenza no atuasaun PNTL Cailaco, situasaun la’o normal hikas, komunidade sira kontinua mantein hodi hein ba partisipa areiar bandeira RDTL iha Cailaco, munisípiu Bobonaru.
Matebian Ronaldinho da Costa Ximenes
Matebian Ronaldinho da Costa Ximenes moris iha Suku Miligo, postu administrativu Cailaco iha loron 13 fulan Maiu tinan 2002 no hakotu iis iha loron 20 fulan Maiu 2025 ho idade ruanulu resin tolu (23) tanba hetan tiru hosi Membru PNTL iha hirus-matan.
Hafoin notísia ne’e publika, SAPNews seidauk halo komfirmasaun ho parte PNTL Cailaco no Administrador Postu Administrativu Cailaco.
Nune’e, notisia kompletu SAPNews sei publika wainhira halo ona komfirmasaun ho parte relevante sira iha Cailaco, Bobonaru.
Maske nune’e, maibe to’o oras ne’e mate isin iha ona mortuária Hospital Nasionál Guido Valadares (HNGV) hodi prepara ba halo autópsia tanba seidauk identifika sasan ruma iha matebian nia isin loron durante operasaun.
Enkuantu, ekipa konjunta mos asegura ona joven sira ne’ebe envolve iha kazu refere hodi submete ba prosesu investigasaun.
Cailaco, 20 Maiu 2025