Imajem : Primeiru Ministru Kayrala Xanana Gusmão iha Bekora, 28/11/2024. Foto : Media PM
SAPNewsTL, Dili : Proklamasaun Independénsia 28 Novembru ba dala-49, Primeiru Ministru Kayrala Xanana Gusmão hateten joven sira presiza haluha buat ne’ebé akontese iha pasadu, labele rona liafuan ne’ebé tenta atu fahe timoroan.
“Prezidente Repúblika nia diskursu naruk ne’ebe nia hato’o hela iha Oe-Cusse nia husu liuliu ba joven sira buat ne’ebe akontese iha pasadu haluha tiha, ita hamutuk iha harmonia nia laran hodi hateke ba rai no povu ida ne’e. Labele se tilun ba liafuan oioin ne’ebe hakarak hafahe ita (Timoroan)”. Tenik PM Kayrala Xanana Gusmão iha Bekora, Dili, 28/11/2024
Xanana Gusmão sublinha representante governu Jakarta ne’ebé haruka hosi Prezidente Repúblika Indonésia Prabowo Subianto no konvidadu sira hosi Malásia mai partisipa loron proklamasaun independénsia ba dala 49⁰ iha RAEOA.
“Iha RAEOA reprezentante governu Jakarta ne’ebe haruka hosi Prabowo Subianto (Prezidente Repúblika Indonésia) mai hamutuk ho general sira balun no hosi nasaun Malázia, ne’e hatudu katak ema fó konfiansa ba ita nia rai, rai ida ne’ebe hatene haluha buat ne’ebe akontese iha tempu ukuk nian”. Xefe Governu sublinha
Xefe Governu ne’e sublinha tempu presenta, tempu atu hari’i armonia no amizade hodi dezenvolve nasaun no hadia povu nia moris.
“Hahu agora kria harmonia no amizade hodi hotu-hotu ko’alia ba malu, oinsa dezenvolve rai no povu ida ne’e nia moris”. Nia hakotu
Tuir observasaun SAPNews iha terrenu nota katak Primeiru Ministru Xanana Gusmão partisipa iha komemorasaun loron proklamasaun independénsia ba dala 49⁰ ne’ebé hala’o iha postu administrativu Kristu Rei, Suku Bekora. Serimónia ne’e prezide hosi Vise Primeiru Ministru Mariano Assanami Sabino.
Jornalista : Dircia Baptista Belo