Imagem : Associação Académica Estudantil FMCS-UNTL halo Konferénsia imprensa iha Lahane, 29/04/2025
SAPNewsTL, Dili : Associação Académica Estudantil Faculdade Medicina Siénsia Saúde (AAE-FMCS), Universidade Nacional Timor Lorosa’e (UNTL) realiza konferénsia imprensa hodi denúnsia aktu irregularidade sira iha faculdade no departamentu.
Universidade Nascional Timor Lorosa’e UNTL estabelese ho Dekreitu Lei N.º 16/2010 hanesan universidade publika ida ne’ebe vincula ho prinsipiu legalidade hodi garante funsionamentu hot-hotu tuir regras/regulamentu, ho baze fundamental ida ne’e, nu’udar matadalalan ba komunidade akademika tomak hanesan Profesor/Dosente, estudante ka estrutura chefia hotu-hotu tenki kumpri no obedese ba normas legais.
Maibe hare’e ba iha realidade Faculdade Medicina Ciencia Saude FMCS liuliu Departamentu Eskola Superior Tecnologia de Saude (ESTeS) mosu irregularidade oioin hanesan kobransa ilegal, ameasa estudante, obriga estudante no halo asédiu sexual ba estudante sira.
“Ami hare’e katak estrutura Fakuldade komete iregularidade, pratika aktu sira hanesan, viola normas universidade, viola prinsipiu no valores ne’ebe UNTL opta, no aat liu tan mak estrutura balun aproveita nia pozisaun iha universidade hodi atinji nia interese pessoal, no grupu nia interese”.Dehan AAE-FMCS Cancio Fernandes iha Kampus UNTL Lahane, 29/04/2025
Porta voz ne’e denúnsia katak aktu sira ne’ebe estrutura komete iha fakuldade FMCS mak hanesan tuir mai ne’e :
1. Aproveita estudante foun ne’ebe suku farda hodi hetan osan, aktu ida ne’e sai ona tradisaun aat estrutura Departamentu ESTeS ne’ebe kada tinan pratika beibeik, aktu ida ne’e komete husi Diretor Departamentu Eskola Superior Tecnologia Saude Sr. Miguel Soares SKM, MMTSC.
Porta vós Estudante Cancio Fernandes
Iha ne’ebe diretor ne’e, obriga estudante sira atu sukat farda iha Alfaiate Felicia tanba tuir informasaun Diretor hetan subornu husi kompainia refere, aktu ida ne’e hatudu katak korupsaun moris ona iha instituisaun públika.
2. Viola prinsipiu paz no harmonia, aktu ida ne’e pratika husi husi Diretor ESTES Sr. Miguel Soares iha ne’ebe Diretor ne’e ameasa atu oho Estrutura Asosiasaun Departamentu ESTeS no Impede ka disolve Asosiasaun ESTeS, aktu ida ne’e hatudu katak diretor la iha kapasidade no la iha maturidade atu lori estudante sira tuir valores universidade nian.
3. Viola normas mak aplika iha universidade, ho violasaun ida ne’e hatudu katak estrutura balun la iha koinesimentu ba norma, no aktu ne’e komete husi Diretor Departamentu Parteira Sr Rafael do Santos Ximenes SKM MPH iha ne’ebe hasai estudante sira nia naran husi lista estagiu sem justa kauza no aplika sansaun disiplinar ba estudante la liu husi conselho Disiplinar.
4. Mal gestaun, aktu ida ne’e pratika husi Vise Decanu Asuntu Estudantil Sr Acasio De Jesus Mahanesan presidenti KO ba praxe academika FMCS ano letivu 2025, iha ne’ebe ami nota katak la ezekuta lolos osan orientasaun akademika nian, nune’e resulta iha orientasaun akademika, kadeira ba estudante sira tur la iha, hahan ba komisaun organizadora la to’o, hola hahan la tuir presu ne’ebe sita iha Budget, la iha mos aimoruk ba primeiru sokoru no ikus falsifika lista KO praxe akademika ano letivo 2025.
5. Kobransa Ilegal, aktu ida ne’e akontese beibeik iha fakuldade medicina ciencia saude iha ne’ebe professor sira obriga estudante, entrega livru, transkrisaun valor $ 10 dolar, kobra estudante sira hola projector no hadia AC maski universidade ne’e finansia husi Orsamentu Geral Estadu (OGE) . aktu ida ne’e konsidera nudar aktu koruptu ne’ebe pratika husi estrutura fakuldade.
6. Asediu sexual, kazu ida ne’e akontese mos iha Fakuldade Medicina Ciencia Saude (FMCS), maski universidade asina ona dokumentu zero asediu sexual iha kampus, aktu ida ne’e hatudu momos katak manorin lakon ona nia moral, tanba aktu ida ne’e docentes nafatin pratika bainhira estudante sira bimbin KRS balun.
Imagem : Senadu Estudantil FMCS-UNTL
Kazu hirak ne’ebe mensiona iha leten, mak liu husi komunikadu imprensa asosiasaun akademika estudantil Faculdade Medicina Ciencia Saude no estudante FMCS hakarak rekomenda ba.
1. Magnifiku Reitor hanesan orgaun masimu universidade nian atu toma medida ba estrutura ne’ebe viola prinsipiu no valores universidade no fakuldade.
2. Hakarak rekomenda ba magnifiku reitor no conselho disiplinar atu loke prosesu hasoru direitor departamentu parteira ne’ebe hasai estudante nia naran husi lista estagiu sem justa kauza.
3.Dekana FMCS atu chamda urjenti ba nia inferior hirarkiku sira ne’ebe nafatin pratika irregularidade iha FMCS liuliu departamentu ESTeS no departamentu parteira.
4. Hakarak husu ba Dekana Fakuldade Medicina Ciencia Saude ho nia estrutura departamentu, docente sira atu labele ameasa assosiasaun akadémika no estudante sira, tanba kampus laos fatin atu ameasa ema ida no laos fatin ba intimidasaun.
5. Husu ba diretor departamentu Parteira atu urjentemente integra hikas estudante sira nia naran ba lista estagiu no labele gere departamentu parteira, tuir nia gostu no vontade.
6. Hakarak husu ba sivistas akademika FMCS atu hamutuk ho asosiasaun akademika Faculdade Medicina Ciencia Saude atu kontinua ijije direitu estudante nian no hatur lolos funsionamentu fakuldade nian tuir regra.
7. Husu ba Asosiasaun Akademika husi Fakuldade hotu-hotu iha UNTL no sivistas akademika UNTL tomak atu apoia ejigensia ida ne’e tanba lakleur tan asosiasaun akademika fakuldade medicina cencia saude sei blokeia total funsionamentu fakuldade nian, karik superior sira la iha vontade atu resolve problema refere.
Ligadu ho preokupasaun ne’e, SAP News tenta halo konfirmasaun ho parte Diretor ESTeS Miguel Soares maibe nia parte rezeita fo informasaun tanba konsidera estudante sira halo konferénsia imprensa sein kunhesimentu husi estrutura departamentu, fakuldade no universidade.
Jornalista : Marciana Da Conceição