Imajem : Adeptu Portugal iha Suku Fatuhada ne’ebe halo barullu wainhira Cristiano Ronaldo hatama golu iha Penalti hasoru França.
SAPNewsTL, Dili – Relasiona Kopa Euro tinan 2024, iha oitavu finais, rezulta nasaun haat hanesan Espanha, França, Inglaterra no Belanda mak sei tama ba kuartu finais.
Iha loron 6 Jullu, Espanha manan Jerman ho skore 2 a 1, França halakon Portugal ho skore 5 a 3, ohin madrugada (07/07/2024) ne’e ekipa Inglaterra manan Suiça ho skore 5 a 3, Belanda halakon Turkia ho skore 2-1.
Rezultadu ne’ebe Portugal hetan orseik, halo adeptu sira iha Timor-Leste laran triste no la halo komboiu haleu kapital Dili hodi selebra hanesan antes Portugal manan Eslovenia.
Adeptu Portugal, Miguel de Carvalho sente triste tebes tanba ekipa Portugal la konsege manan França.
“Ha’u sente triste teb-tebes tanba Portugal lakon hasoru França ho skore 3-5 iha meius penaltu, maske lakon maibe ne’e normal iha mundu desportivu, joga mak lakon maibe desportivu nunka lakon, entaun ha’u nia esperansa Portugal bele sai diak liu tan iha Kopa tuir mai liliu Kopa Mundial”. Tenik Miguel de Carvalho ba SAPNews iha orseik madrugada, Fatuhada, 06/07/2024
Carvalho hatutan, adeptu sempre triste bainhira lakon maibe laiha problema tanba ne’e mak kultura jogu, maibe hakarak husu katak la presiza tolok malu no defama jogador internasional sira tanba buat ne’ebe ema imajina la hanesan ho realidade.
“Ita la presiza tolok malu nein insulta jogador internasional sira, so ita presiza deit atu buka hatene no kompriende ispíritu desportiva no dezenvolvimentu desportu iha mundu, se ita iha Timor insulta malu ka tolok jogador sira, ne’e so ita lakon enerjia deit tanba ita la kompriende no ema nein hatene ita kona ba saida mak ita hateten sai ba ema”. Miguel sublinha
Imajem : Entrevista Adeptu Portugal Miguel de Carvalho iha Fatuhada, Dili, 06/07/2024. Foto : Marciana da Conceição
Adeptu Portugal ne’e rekunhese, dala barak iha prosesu jogu la’o, wainhira manan adeptu halo barullu no komboiu maibe wainhira lakon sente triste no hakmatek, ne’e normal iha mundu desportivu, la presiza hatun ema no ko’alaia aat ema.
“Wainhira manan ita halo barullu no komboiu, iha prosesu jogu ita sempre halo barullu tanba ita diverte an, maibe wainhira lakon ita sempre fuan boot simu realidade, simu ho triste, nonok no hakmatek, la tolok ka ko’alia aat ema, ne’e tanba ita kompriende mundu desportu”. Miguel Carvalho hateten
Hafoin, Portugal derrota konta França tanba João Felix la hatama golu iha meiu penaltu, Jogador Portugal sira inklui Cristiano Ronaldo no Pepe hatudu tristeza no tanis tanba halo esforsu hot-hotu maibe la konsege realiza mehi.
Fo hatene fali katak Selesaun Nasional Espanhol sei hasoru França iha jogu kuartu final, Inglaterra sei hasoru Belanda iha jogu tuir mai.
Observasaun Jornalista SAPNews iha terenu nota katak adeptu Portugal sira rihun ba rihun sente triste no la halo komboiu, hafoin akompanha rezulta ida-idak fila ba uma ho nonok no la halo barulltu tanba Portugal derrota kontra França.
Jornalista : Marciana da Conceição & Conzita Mota