Imajem : ADTL hamutuk parseiru sira lansa profil membru sira iha Suai Room, Timor Plaza, 28/02/2025. Foto : Ermelinda Soares
SAPNewsTL, Díli – Asosiasaun Difisiénsia Timor-Leste (ADTL) realiza enkontru trimestral ho membru sba dala-24 hodi identifika nesesidade formasaun, sosializasaun estrategia DFAT no lansamentu directory ho profile membru organizasaun.
Direitor Ezekutivo ADTL Cesario da Silva hateten, Asosiasaun Difisiénsia Timor-Leste (ADTL) hala’o enkontru hamutuk ho defisiente no parseiru sira hosi Australia hodi identifika saida maka membru no organizasaun sira halo ona ba ema ho defisiensia.
“Ohin Asosiasaun Difisiénsia Timor-Leste enkontru hamutuk ho belun difisiensia no parseiru sira hotu ba trimestral membru ADTL ba dala-24. Ida ne’e inisiu ba ita atu identifika membru sira liu-liu atu hatene organizasaun ADTL, membru agora iha ona 27 no saida maka sira halo ona ba ema ho defisiensia”.
“Importante tebtebes ita ko’alia mos inkluzaun ema ho defisiensia iha instituisaun iha sosiedade sivíl, liña ministeiral no organizasaun ne’ebe maka marka prezensa iha ne’e”. Dehan Direitor Ezekutivo ADTL Cezario da Silva, iha Timor Plaza Suai Room, Sesta feira (28/02/2025).
Diretor ne’e akresenta, sira mos lansa ona livru ne’ebe sei rai iha organizasaun sira hodi sai hanesan ligasaun parseiru bainhira ema lee bele hatene organizasaun ADTL, konsidera livru refere bele hafasil sira nia servisu.
“Livru ida ne’e hatudu ona membru sira ne’ebr servisu nia naran hakerek kompletu hotu iha livru laran, ita lansa livru ida ne’e sei rai iha organizasaun hotu halo hanesan ligasaun parseiru bainhira ema lee, livru ne’e ema hatene organizasaun ne’e hari’i iha ne’ebe no fatin iha ne’ebe sira hatene tanba livru sai hanesan matan ida mos ba sira no hafasil servisu hamutuk”. Dehan nia
Diretor ne’e kontente no agradese ba reprezentante Governu Australia ne’ebe fahe estratejia iha mundu agora. ADTL kontinua servisu hodi halo advokasia ba Governu, sosiedade sivil no entidade ho liña ministerial hodi halo dezenvolvimentu diak ba ema ho difisiensia.
“Ha’u sente kontente tebes ba reprezentante Governu Australia ne’ebe fahe sira nia estratejia iha mundu agora, ADTL nia servisu atu kontinua halo advokasia ba Governu, sosiedade no entidade ho liña ministerial atu hala’o dezenvolvimentu di’ak ba ema ho defisiénsia (EhD), ida ne’e mos sai baze atu ita bele kontinua planu asaun nasional luta EhD sai baze atu kontinua”. Nia subliña.
Iha fatin hanesan, reprezentante Governu Australia iha Timor-Leste Felicity hateten, Governu Australia iha komitmentu hodi servisu hamutuk ho ADTL liu-liu ema ho defisiénsia sira hodi kria mos oportunidade ba sosiedade ne’ebe inkluzivu iha Timor-Leste.
“Governu Australia iha komitmentu bo’ot atu servisu hamutuk ho nasaun Timor-Leste liu-liu ema ho defisiénsia sira, Governu Australia servisu hamutuk ho assosiasaun Difisiénsia Timor-Leste atu kria oportunidade ba sosiedade ida ne’ebé inkluzivu no ba ema hotu iha Timor-Leste”. Dehan Felicity.
“Ami senti orgullu la’o hamutuk ho parseiru sira hanesan ne’e, fó mós obrigada ba ita nia servisu iha liña ministeiral sira maske ita nia servisu todan ituan maibé apresia ba imi nia lideransa iha era ida ne’e”.
“Ha’u fo parabens ba ita nia lansamentu teritorial katak ita nia servisu hamutuk ajuda ema ho Defisiénsia iha Timor-Leste atu asesu ba servisu, oportunidade sira iha Timor-Leste no iha munisipiu hotu”. Nia kontente
Enkuantu, governu Australia husu atu bele servisu hamutuk ho ADTL iha tempu naruk nia laran nune’e bele ajuda EhD hodi hetan oportunidade iha servisu. Sira mos iha estrategia foun liga ho defisiente sira iha mundu tomak liu-liu Timor-Leste.
Jornalista : Ermelinda Soares & Dircia Baptista Belo