Imajem : Jornalista SAPNews Entrevista Inan Feton Olandina Xavier iha foto tutun Rabilau,Maubisse,18/10/2024. Foto : Daniel da Silva
SAPNewsTL, Ainaru : Inan Feton Olandina Xavier sente orgullu partisipa iha festivál rabilau, durante entrevista Olandina husu fetoran no mane klosan sira hodi eskola didiak, aproveita tempu diak ne’ebé hetan hosi sai ema diak no hetan moris diak iha loron aban bainrua.
Inan feton Olandina Xavier ho idade tinan limanulu resin-lima (55), Moris iha Suku Horai-Ki’ik, Postu Administrativu Maubisse, Munisípiu Ainaru.
Wainhira dada lia ho Jornalista SAPNews, Olandina Xavier sente laran ksolok tanba bele partisipa iha festivál rabilau, nia parte agradese ba Prezidente Repúblika José Ramos Horta tanba bele hola inisiativa hodi realiza festivál iha Maubisse.
“Ha’u sente laran kontente tanba bele haree no tuir festivál rabilau, ha’u agradese ba Prezidente Repúblika José Ramos Horta ne’ebé hola inisiativu furak ida ne’e, obrigadu barak ba Prezidente Repúblika”.Tenik Olandina Xavier ba SAPNews iha Rabilau, Maubisse, 18/10/2024.
Inan feton ne’e husu foinsa’e feto no mane hotu atu bele hatutan eransa kultural ne’ebé beiala sira husik hela tanba ne’e mak patrimóniu úniku ne’ebé avó sira husik hela.
“Iha festivál rabilau, inaugura uma lisan rua, ema barak mak ho tais kultura ho munisipiu ida-idak nia identidade, momentu furak ne’e bele hametin ita nia identidade no promove tebes duni kultura Timor nian ba mundu, tan ne’e foinsa’e feto no mane, presiza kontinua hatutan eransa kuktura ida ne’e”.Olandina sublinha
Inan feton ne’e husu sidadaun hotu iha Timor no iha mundu hodi bele halo vizita ba fatin furak iha rabilau Maubisse.
“Ha’u husu ba ema hotu, atu mai vizita fatin turismu rabilau, mai haree fatin furak, foho barak, fatuk barak, vizita gruta nossa senhora da grasa no sente Maubisse ninia malirin, Maubisse imi nian hotu, karik imi mai, ami simu imi ho liman rua”. Nia tatoli
Olandina konsidera futuru iha joven sira liman, tan ne’e nia husu ba fetoran no mane klosan sira hodi eskola didiak, badinas estuda no la’o barak hosi duni ida-idak ninia mehi to’o hetan iha futuru.
“Ba joven sira, imi tenki eskola didi’ak, futuru iha imi nia liman, ohin ami moris iha susar laran, ami lakohi imi moris tan iha terus nia laran hanesan ami agora, ha’u hakarak katak imi tenki moris diak no ksolok iha loron aban bainrua”. Hatete Xavier
Xavier mós husu jerasaun foun sira hodi kria paz no estabilidade, labele involve iha konflitu no estraga malu maibé haree malu nu’udar maun ho alin iha rai Timor Lorosa’e ne’ebé ema rihun ba rihun mate mak sosa nia liberdade”. Nia husu
“Joven sira buka hadomi malu, respeita malu, kuidadu malu, haree malu didiak, labele hanoin halo problema, fahe malu no estraga malu. Uluk ami sente no haree ho matan katak isin asu mak dada, ran asu mak lambe tanba ne’e ami lakohi imi nia futuru repete saida mak ami sente ona iha tinan 24 nia laran (1974-1999)”.
“Ha’u husu mós ba inan aman sira hotu, atu dudu no tau matan ba oan no beioan sira hodi eskola, estuda, esforsu, badinas hosi bele hetan sira nia futura ne’ebé furak iha sira nia moris”.Nia hakotu
Enkuantu, Festivál Rabilau hahú abertura iha loron 16 fulan Outubru no ensera ona husi Prezidente Repúblika José Ramos Horta iha loron 18 Outubru tinan 2024.
Jornalista : Marciana Conceição & Daniel da Silva