Imajem : Komunikadu Imprensa Koordenador Nasionál Rede ba Rai Padrito Loivacho Vieira hamutuk ho organizasaun sosiedade sivil iha salaun fundasaun haburas Farol, 22/04/2024.
SAPNewsTL, Díli – Organizasaun Sosiedade Sivil Rede ba Rai (RbR) lamenta ho akontesimentu injustisa no desigualdade direitu ba rai ne’ebe daudaun ne’e fo impaktu bo’ot ba maluk Timoroan sira ne’ebe hetan eviksaun.
Tuir Kordenador Nasional Rede ba Rai (RN-RbR) nia hare’e, Timor-Leste dadauk ne’e mosu injustisa no desigualdade ba direitu ba Rai, komunidade barak mak ameasadu atu lakon sira nia rai tanba laiha politika ida integradu atu asegura komunidade sira nia direitu ba rai tanba sistema registrasaun Rai iha Timor-Leste ne’ebe halo diskriminasaun ba feto ho ema ne’ebe defisiensia sira.
“Governu liu-liu Ministeriu Justisa (MJ) la halo sosializasaun Lei ba rai no komunidade barak mak la kmpmrende sira nia direitu ba rai no estadu rasik laiha planu manajementu, monitorizasaun no kontrolu diak ba estadu nia propriedade sira” Hateten Koordenador Nasionál Rede ba Rai Padrito Loivacho Vieira ba jornalista sira iha salaun fundasaun haburas Farol, 22/04/2024
Nia afirma, nu’udar kapital nasaun, Dili sai sentru konsentrasaun ba atividades hotu-hotu obriga ema barak husik hela sira nia fatin atu mai iha Dili buka moris no sobrevive, Wainhira estadu laiha kontrolu diak mak ema barak sei okupa Rai arbiru hodi hela no buka moris.
Rede ba Rai konsidera kondisaun ne’ebe mak daudauk ne’e akontese ho despezu ne’ebe Governu liu husi, Secretario Estadu Asuntu Toponimia no Organizasaun Urbana (SEATOU) halo ba komunidade sira iha Bidau no Ai-tarak laran ne’e sem prepara kondisaun antes, fo risku tebes ba komunidade liu-liu inan feton no labarik sira ne’ebe laiha fatin alternativa.
“Despezu ne’ebe mak dadaun ne’e akontese tuir Rede ba Rai, Estadu halo avaliasaun boot ba direitus umanus tamba ita nia estadu Timor nu’udar nasaun ratifikador ba konversaun direitus umanu no mos iha tempu ita sai nasaun violador ba konvensaun sira ne’e tanba ita sein prepara kondisaun ba komunidade sira”.
Tuir Artigu 76 iha Lei NU 13/2017 Lei Definisaun Tituladidades ba hein imovel mos esplika kona ba despezu, iha No 2 katak, despezu tenki halo ho kondisaun ne’ebe garante dignidade umana, direitu no seguransa husi ema sira ne’ebe afeitadu tanba despezu, mos respeitu ba prinsipiu proporsionalidade, adeakuasaun no la ho diskriminasaun
Organizasaun Rede ba Rai husu, “Governu tenki iha planu no politika ba Rai ne’ebe integradu atu bele asegura komunidade sira nia direitu ba Rai, hodi garante sistema rejistrasaun Rai ida ne’ebe kualidade no la iha deskriminasaun ba feto ho defisiensia, hodi halo atribuisaun ba Rai, Resolve kazu disputa sira bazeia ba dadus ne’ebe rejista ona kriasaun Lei komplementares sira tenki aselera no garante akuntabilidade komisaun ida terras tenki halo nia kna’ar tuir lei 13/2017”. Nia husu
Organizasaun Rede ba Rai rekomenda ba Ministeriu justisa liu husi Diresaun Nasional Terras prorieddes tenki halo manjamentu, monitoriza no kontrolu ba propriedade no Rai estadu sira.
“Ami husu ba SEATOU atu respeita no halo tuir konvensaun internasional Direitus Humanus, sira ne’ebe mak nasaun Timor-Leste ratifika ona, ami husu ba PDHJ nu’udar instituisaun defende direitu umanus responde situasaun sira ne’e ho urjensia hodi asegura afeitadu eviksaun sira’.
Organizasaun ne’e mos husu ba Governu atu halo sentru akolhamentu temporaria urjenti atu akumula afeitadu sira tanba agora daudauk iha tempu udan, inklui husu Parlamentu Nasional nu’udar representante povu atu fo atensaun ba SEATOU esklarese ho klaru planu ne’ebe sei sai kazu ba despezu sira iha Dili.
Daudaun ne’e, SEATOU Germano Santa Brites Dias hamutuk ho ekipa sobu ona baraka 93 iha merkadu komoru, uma 21 iha aitarak-laran, uma no baraka 19 iha terminal Bekora, uma no barak lubun ida iha Metiaut.
Tuir planu, SEATOU sei sobu okupante espasu públiku iha Fomentu 1, Aldeia 12 Novembru Tasi-Tolu, inklui okupante sira seluk iha kapital Dili.
Jornalista : Eleonora Fátima dos Santos