Imajem : Eis Primeiru Ministru, Sekretáriu Jeral FRETILIN Mari Bin Amude Alkatiri iha Sede CCF Comoro, 07/11/2024.
SAPNewsTL, Dili : Relasiona ho polêmika ro haksolok ne’ebe públiku preokupa durante ne’e, Eis Primeiru Ministru Mari Alkatiri deklara iha ona solusaun ba ró haksolok, enkuantu Primeiru Ministru Kay Rala Xanana Gusmão afirma katak nia parte sei responsabiliza ba estaleiru refere.
Eis Primeiru Ministru Mari Bin Amude Alkatiri deklara katak iha ona solusaun ba Ró haksolok maibe se lakohi maka ró haksolok sei dodok iha Portugal, kuandu dodok maka tenki responsabiliza.
“Solusaun ba ró haksolok iha ona, se lakoi tuir ida ne’e, entaun halo diak liu labele husik dodok, kuandu ró haksolok dodok se mak lakohi maka tenki responsabiliza”. Tenik Eis Primeiru Ministru Mari Bin Amude Alkatiri iha Sede CCF Comoro, 07/11/2024.
Imajem : Primeiru Ministru Kayrala Xanana Gusmão iha sala plenaria Parlamentu Nasionál, 08/11/2024.
Entretantu, hatan ba preokupasaun deputadu sira nian iha Parlamentu Nasionál, Primeiru Ministru Kayrala Xanana Gusmão hateten nia parte sei responsabiliza ba ró haksolok tanba nia mak asina iha tinan 2014.
“Ita boot labele preokupa kona-ba ró haksolok tanba ita boot rasik mos dehan katak iha tinan 2014, ha’u rasik mak asina, ne’ebe preokupa halo saida. Ha’u mak asina ne’ebe buat ruma karik ha’u mak sei responsável”. Xefe Governu Xanana Gusmão deklara
Imajem : Ró Haksolok
Fo hanoin fali katak Timor-Leste halo investimentu ba ró haksolok ho osamentu hamutuk 12 milhões hodi finansia ba Kompanha internasional ida iha tinan 2014, maske nune’e maibe to’o ohin loron Ró haksolok sei nafatin iha inserteza nia laran.
Tuir planu nonu governu konstitusional sei halo auditoria internasional ba ró haksolok tanba konsidera mosu ona irregularidade ba obra ne’e.
Jornalista : Marciana da Conceição