Ambitu ELPAR 2023, SEII Realiza Seminariu Nasional Hametin Paz Ba Igualdade & Inkluzaun
SAPNewsTL, Dili: Sekretariu Estadu Igualdade no Inkluzaun (SEII) realiza seminariu nasional ho tema hametin paz no seguransa hodi eleva igualdade no inkluzivu iha ambitu Eleisaun Parlametar (ELPAR) 2023 tanba sidadaun hotu iha direitu atu ezerse sira nia direitu iha eleisaun tinan ne’e.
Imajen: Diretór Jeral SEII Armado da Costa
“Ohin SEII hamutuk ho parseiru sira hanesan feto prontu lidera, ami realiza seminariu nasional kona ba paz no seguransa ba prespetiva igualdade no inkluzaun iha ambitu eleisaun parlametar nian ho objetivu mak ita hakarak instituisaun relevante sira fornese servisu públiku relasiona ho eleisaun parlametar 2023 nian bele asegura votante sira liuliu ema defisiente sira, katuas, ferik no inan isin rua sira ho masimu atu nune’e sira ezerse sira nia direitu votu no asegura kandidata feto sira”, dehan diretor jeral SEII Armado da Costa ba jornalista sira iha salaun Delta Nova, Dili kinta 27/04/2023.
Diretór jeral hatutan, partisipante sira iha seminariu ne’e mai husi sosiedade sivil sira toma konta feto partisipa iha politika, estudante universidade sira, lideransa feto komunitariu sira husi munisipiu Dili no orador sira mai husi PNTL esplika seguransa ho paz asegura ema ho espesial sira hanesan defisiente, ferik, kartuas no inan isin rua, parte igreja koalia prepestiva ba igualidade no inkluzaun iha eleisaun parlametar 2023 koalia nian, ADTL kolia partisipasaun ema ho defisiente sira iha eleisaun, CNE no STAE oinsa asegura ema hotu ezerse direitu iha eleisaun agora ne’e.
Armando informa, sira enkaixa prespetiva igualdade no inkluzaun ba observador nasional no internasional sira atu hare’e asuntu partisipasaun ema hotu liuliu ema ho defisiente, ferik, katuas no inan isin rua sira iha eleisaun parlametar agora karik STAE no CNE la prepara kondisaun diak ruma ba partisipasaun ba igualidade no inkluzaun nian sira sei hatama rekomendasaun para CNE ho STAE hadia diak liu tan.
Nia afrima tan, sira husu ema ho defisiente sira atu partisipa iha eleisaun parlametar agora tanba ema hotu iha direitu fo votu ba partidu politiku sira tanba CNE ho STAE sei servisu makaas ema ho defisiente sira hala’o direitu votu ho diak.
Iha fatin hanesan partisipante Cesarina A. da C. V. P. Gaiu hatete, nia apresia tebes partisipa serimónia nasional tanba bele hatene nia direitu votu iha eleisaun parlametar agora no sei fahe tutan buat ne’ebe nia hetan ba iha ninia sosiedade tanba votu determina futuru iha tinan lima mai.
Imajen: Partispante Cesarina A. da C. V. P. Gaio
“Nu’udar estudante hau apresia tebes hola parte iha seminariu nasional ne’e tanba hau bele hatene ona oinsa ezerse hau nia direitu hodi fo votu ba partidu hau hakarak iha eleisaun parlametar agora nune’e hau mos sei pasa fali buat ne’ebe ohin hau hetan fahe tutan ba iha sosiedade tanba ita nia votu determina tebes ba ita nia futuru iha tinan lima mai tanba ita tenki hare’e partidu politiku sira tanba ita fo votu sira bele atende ita nia nesesidade maski la barak maibe oituan mos ita hetan”, tenik Cesarina
Reportajen: Augusto dos Santos