Imajem : Xefe Governu Kayrala Xanana Gusmão kaer liman ho Prezidente Bankada FRETILIN Aniveto Guterres iha Sala Plenária Parlamentu Nasionál 08 Novembru 2024. Foto : Media PM
SAPNewsTL, Dili : Deputadu sira iha Parlamentu Nasionál (PN) aprova Orsamentu Jerál Estadu (OJE) tinan 2025 iha faze diskusaun Jeneralidade ho montante hamutuk billaun $2,6 ho votus afavor 42, kontra 0 no abstensaun 22.
Tuir komunikasu ne’ebé SAPNews asesu liu hosi Pajina Ofisial Primeiru Ministru Kayrala Xanana Gusmão informa katak aprovasaun ne’e ho votu afavor hamutik 42, kontra 0 no abstensaun 22
Primeiru-Ministru (PM), Kay Rala Xanana Gusmão hateten povu hili ita hotu atu servi, agradese ba deputadu sira iha Parlamentu Nasionál tanba hatudu duni debate demokrátiku ne’ebé tuir duni regras demokrátiku.
“Povu hili ita hotu hodi servi, osan kiik no osan boot, ita uza hodi servi povu ida ne’e, agradese ba ita hotu, tanba hatudu duni debate demokrátiku ne’ebé tuir duni regras demokrátiku”. Tenik Primeiru Ministru Kayrala Xanana Gusmão iha PN, 08/11/2024.
Kay Rala Xanana Gusmão hatutan, komisaun funsaun públika sei apresenta polítika ida hodi haree ba problema saláriu funsionáriu públiku ba futuru hodi hadia makina estadu.
“Ita tenki hadia makina do estadu, ita sei haree saláriu ba funsionáriu sira, komisaun funsaun públika (KFP) sei haree polítika ida hodi haree didiak katak selu ema maibé tenki servisu, KFP mós sei halo politika ida hodi aprensenta ba konsellu ministru hodi ita bele haree, ita tenki servisu diak, lae, sai”. Kay Rala Xanana Gusmão sublinha
Enkuantu, Xefe Governu husu Parlamentu Nasionál katak, bainhira hotu-hotu ho intensaun atu serví povu maka bele bolu Governu atu hato’o progressu servisu dala-rua kada fulan perante reprezentante povu no públiku.
Fo hanoin fali katak debate OJE iha faze jeneralidade durante loron tolu (06-08/11/2024) no PN sei kontinua debate iha faze espesialidade to’o loron 25 fulan novembru tinan 2024.
Jornalista : Conzita Mota & Dircia Baptista