Imajem : Motor rua soke malu iha Kuluhun, postu administrativu Cristo Rei, 03/08/2024. Foto : Dircia Baptista Belo
SAPNewsTL, Dili – Ohin dader maiz ou menuz tuku 11 liu minutu lima (11:05 AM, Dili,03/08/2024) mosu asidente ida iha estrada públiku suku Kuluhun, postu administrativu Cristo Rei, Munisipiu Dili.
Asidente ne’e rezulta sidadaun mane ida ho nia fen sofre kanek tanba hetan soke husi sidadaun mane ida ho motor Meo-Beat, wainhira halai sai husi Aldeia Toko-Baru 2 hodi korta estrada.
Sidadaun ne’ebe hetan soke ne’e halai husi diresaun Bekora ba Bidau, sidadaun refere tula nia fen halai ho velosidade makaas. Nune’e la konsege trava no hetan soke iha fatin refere.
Hafoin asidente ne’e mosu, Ambulásia to’o kedas iha fatin akontesimentu hodi transporte vítima na’in rua ba Hospitál Nasionál Guido Valadares (HNGV) hodi halo tratamentu emergénsia.
Sidadaun ne’ebe soke vítima na’in rua, akompanha kedas vítima hodi lori ba ospitál ho ambulánsia, tanba nia parte rekunhese no asume responsabilidade ba asidente ne’ebe akontese hodi rezulta vítima rua hetan kanek.
Enkuantu, vítima na’in rua la hetan kanek grave maibe hetan kanek kmaan iha liman no ain.
Durante asidente ne’e, Eskuarda Polísia Nasionál Timor-Leste (PNTL) postu administrativu Cristo Rei mos to’o ona iha lokal akontesimentu hodi halo identifikasaun ba kauza husi asidente refere.
Jornalista : Dircia Baptista Belo