Imajem : Repúblika Indonézia, Roberto Sarmento de Oliveira Soares iha Palásiu Prezidensial Aitarak-Laran, 05/08/2024. Foto : Média PR
SAPNewsTL, Dili – Embaixadór Repúblika Indonézia, Roberto Sarmento de Oliveira Soares hasoru malu ho Presidente Repúblika Jose Ramos Horta, iha sorumutu ne’e parte rua ko’alia kona ba knar ne’ebé sei hala’o iha Indonézia.
Embaixadór Repúblika Indonézia, Roberto Sarmento de Oliveira Soares, sublinha Presidente Repúblika husu atu servisu tuir kapasidade no kria kooperasaun foun hodi bele haklean liu tan servisu ne’ebé mak atu hala’o iha ne’ebá.
“Prezidente Repúblika José Ramos Horta nia mensajen mak husu atu ha’u halo servisu ho kapasidade ne’ebé iha atu bele dezenvolve, kria kooperasaun foun hodi bele haklean defeza seguransa, edukasaun, ekonómia no sosíu kulturál”.
“Iha ámbitu ida ne’e Timor Leste iha hela preparasaun atu sai membru ASEAN tanba ne’e Timor Leste hanesan país ida ne’ebé besik tebe-tebes ho Indonézia bele buka oinsá atu explora kooperasaun di’ak liu hodi reforsa Timor Leste nia adezaun ba ASEAN,”dehan Embaixadór Repúblika Indonézia, Roberto Sarmento de Oliveira Soares ba jornalista sira iha Palasiu Presidensial, 05/08/2024.
Embaixador foun ne’e afirma nia parte sei servisu makaas liu tan hodi kontribui no konkretiza mehi Timor-Leste nian kona ba adezaun ba ASEAN.
“Mehi atu sai membru ASEAN ne’e ita nia mehi, konserteja mehi ne’ebé ita fó sai ona no agora atu konkretiza nia prosesu sira ne’e la’o ba oin ne’e oinsá, iha ministériu ne’ebé responsabiliza direitamente ba asuntu sira ne’e mak MNEK ho Vise Ministra Asuntu ASEAN”.
Roberto Sarmento fundamenta, durante mandatu nia sei servisu hamutuk hodi bele reforsa no unifika polítika kona ba diplomasia rejionál, nune’e bele lori Timor-Leste tama iha ASEAN.
“Ha’u iha Jakarta sei servisu mós besik liu tan ho Timor Leste nia embaixadór ne’ebé mós akreditadu ba iha Sekretáriu ASEAN, ami sei servisu hamutuk atu bele reforsa no unifika ita nia polítika kona-ba diplomásia rejionál, nune’e bele projeta mehi hotu-hotu nian bainhira ASEAN prontu atu simu Timor Leste sai hanesan membru ba ASEAN,” hakotu nia.
Jornalista: Guilhermino Ramos