SAPNewsTL, RAEOA : Prezidente Autoridade Rejiaun Administrativu Espesiál Oé-cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Arsénio Paixão Bano, lansa fatuk dahuluk ba projetu konstrusaun postu integradu Oésilo tanba konsidera Oésilo importante tebes ba RAEOA reprezenta Timor Leste atu hametin relasaun ho Indonézia.
Konstrusaun postu integradu Oésilo nia objetivu atu fasilita atendimentu servisu iha fronteira hodi hamenus kiak no hasa’e kresimentu ekonomia, postu integradu ne’e kompostu hosi atendimentu Alfandega, servisu Imigrasaun, Saúde, Banku, Kuarantena, Transporte.
“Projetu konstrusaun postu integradu Oésilo konstrui iha fronteira Suku Bobometo Sub-rejiaun Oésilo ligadu ho Napan Indonézia importante tebes no RAEOA konsidera postu integradu perdamain (Paz) atu hametin relasaun entre Timor leste ho Indonézia tanba RAEOA sai espellu Timor Leste ba nasaun viziñu indonézia”, Hateten Prezidente Autoridade RAEOA no ZEESM TL iha lansamentu postu integradu Oésilo,16/10/2023
Ezekutivu RAEOA ne’e realsa konstrusaun postu integradu Oésilo konstrui fazeadamente hahú ho infraestrutura báziku atu prepara konstrui postu integradu refere hahú ho servisu Alfandega nian.
Aleinde konstrusaun postu integradu Oésilo RAEOA mós hahú prepara kondisaun infraestrutura báziku ho projetu konstrusaun estrada nasionál Tono-Oésilo no Noefefa-Oenunu ne’ebé servisu la’o namanas hela, hosi Projetu hirak ne’e bazeia ba planu IX Guvernu konstitusionál ne’ebe prosesa daudaun molok atu adere ba Asean.
Xefe Suku Bobometo Yosep Elu no Jestor Sub-rejiaun Oésilo Domingos Marques agradese ba inisiativa Autoridade RAEOA tanba bele lansa fatuk dahuluk ba projetu konstrusaun postu integradu Oésilo ne’ebé tinan barak komunidade sub-rejiaun Oésilo hein hela.
“Agradese tebes tanba hó inisiativa Autoriedade RAEOA nian, ohin lansa ona projetu konstrusaun Postu Integradu Oésilo”. Hatete Sefe Suku Bobometo
Partisipa iha lansamentu projetu konstrusaun postu integradu Oésilo, Membru Autoridades, reprezentante MNEK, Delegasaun hosi NTT no TTU, KBRI destakadu RAEOA, Konsuladu Timor leste iha Atambua, F-FDTL destakadu RAEOA, Dirtor rejionais, Xefe Departamentu, Jestor Sub-rejionais, Xefe Suku, no komunidade.
Jornalista : Marcela Mesquita Lemos