Imajem : Komunidade Lauana-Letefoho hamulak hodi bolu udan tanba bai-loron naruk fo impaktu negativa ba plantasaun iha Letefoho,19/11/2024. Foto : Marciana da Conceição
SAPNewsTL, Ermera – Komunidade hosi Suku Lauana realiza seremónia kultura hodi bolu udan tanba kauza hosi impaktu mundansa klimátika halo udan mai la tuir tempu.
Kultura bolu udan desde beiala sira nian to’o mai jerasaun ohin loron, sira nafatin kontinua kultura ne’e bainhira tempu bailoron naruk halo udan mai la tuir tempu hodi fó impaktu ba produsaun komunidade nian.
Lia na’in Manuel Kolisana hateten, mudansa klimátika halo bai-loron naruk ne’ebe fó impaktu udan mai la tuir tempu sira sempre hala’o kultura bolu udan.
“Kona-ba mudansa klimátika desde beiala sira nia tempu, bainhira bailoron naruk tenke bolu udan atu fo matak malirin ba ema hotu-hotu.” Dehan lia na’in sarin tolu Manuel Kolisala ba jornalista sira hafoin halo kultura bolu udan iha suku Lauana Aldeia Hohulu,19/11/2024.
Lia nain ne’e informa, iha fatin refere iha umalisan hamutuk neen hanesan Maka-Leldu, Komuli, Dasu-Mau, Mau-Libu, Letebu no Bihahe. Uma lisan boot liu maka Leldu ne’ebe sai sentru ba uma lisan hotu-hotu.
“Iha ne’e iha knua ne’en ida maka Leldu, Komuli, Dasu-Mau, Mau-Libu, Letebu no Bihahe, sira ne’e uma lisan boot los mak Leldu ne’e no nia ukun iha uma kain 27, knua ida ne’e mak sai sentru ba knua hotu-hotu”.
Imajem : Lia na’in Manuel Kolisana
Manuel Kolisana konta, bee-matan ne’ebé sira kuru iha haat hanesan soi laka, fahi luha, huterlesu no binumata. Atu bolu udan tenke ba iha bee matan ida-idak, bainhira ba iha bee matan ida hodi bolu udan maka la mai tenke ba ida fali, halo hanesan to’o iha bee matan ikus ne’e hakarak ka lakoi udan tenke tun.
“Bee-matan ne’ebé ami kuru iha haat primeiru maka soi-laka, fahi-luhan, huter-lesu no binu-mata. Bainhira husu iha primeiru maka udan la mai tenke ba fali segundu, se nafatin la mai ba fali ida seluk to’o iha dahaat ne’e udan ben tenke mai ona”. Nia hakotu
Imajem : Xefe Suku Lauana Miguel Gomes Maia iha Lauana,19/11/2024
Iha fatin hanesan, Xefe Suku Lauana Miguel Gomes Maia hateten, sente orgullu tamba média bele to’o iha Lauana hodi fó sai sira nia lian ba públiku bele asesu liliu parte governu.
“Agradese tanba média bele to’o iha ami nia suku hodi hato’o ami nia lian ba nai ulun sira tanba ami mesak mak ba hato’o dalaruma to’o tinan lima foin hasoru sira”. Nia subliña.
Xefe suku ne’e informa Suku Lauana iha aldeia hamutuk sanulu no entre aldeia sanulu ne’e aldeia ne’e maka asesu ona bee no haat mak seidauk tamba sira iha liu foho lolon no bee iha fali foho okos.
Suku Lauana kompostu hosi aldeia hamutuk sanulu entre sanulu nee aldeia ne’en maka asesu ona bee no haat maka seidauk asesu tamba sira iha foho leten no be nee iha fali foho okos nune’e be labele ba too iha sira Nia fatin”. Dehan sefe suku Lauana.
Entretantu, komunidade sira iha suku Lauana hala’o kultura bolu durante semana rua. Aldeia sanulu iha suku Launa hanesan Gurotu, Kirilelo, Roulu, Limilohi, Raebouainapa, Rebusloi, Alosai, Hatugeo, Leubasa no Luabe. Entre aldeia sanulu ne’e Alosai, hatugeo, leubasa no Liabe seidauk asesu bee-moos.
Notisia ne’e SAP News TL rekolla liu hosi programa media tour ne’ebé organiza hosi OXFAM no Assosiasaun Jornalista Timor-Leste (AJTL).
Jornalista : Marciana Conceição
#Ermera #Letefoho #Sapnewstl #timorleste #climatechange #Clima #ClimateAction #ClimateActionChallenge #climatejustice