Imajem : Embaixador Boa Vontade Prezidente Republika ba Investimentu no Komérsiu iha Rejiau Asia, Ong Bang Poh Michael, iha Palásiu Governu, 08/07/2024.
SAPNewsTL, Díli – Primeiru Ministru (PM) Kayrala Xanana Gusmão enkontru ho Embaixador Boa Vontade Prezidente Republika ba Investimentu no Komérsiu iha Rejiau Asia, Ong Bang Poh Michael, ko’alia kona-ba oportunidade setor mina-rai no gás iha Timor-Leste.
Embaixador Boa Vontade Prezidente Republika ba Investimentu no komersiu iha rejiaun Asia, Ong Bang Poh Michael hateten, antes ne’e iha delegasaun nasaun rua husi Xina no Hong Kong buka oportunidade ba investimentu setor mina-rai no gás.
“Ami ko’alia kona-ba oportunidade balun iha ne’e tanba antes ne’e, iha delegasaun rua husi Xina no Hong Kong no mos buka oportunidade iha setor mina-rai no gás”.
Embaixador ne’e afirma, sira nia parte interesada atu hari’i fundu bankária investimentu no negosiu kafé iha Timor-Leste
“Ami mós interese tebes atu hari’i fundu bankáriu investimentu iha Timor-Leste no mós negosiu kafé nian, ami hein katak bele halo tuir duni”. Dehan Embaixador Boa Vontade Prezidente Republika Ong Bang Poh Michael ba jornalista sira hafoin remata enkontru iha Palasiu Governu, Segunda 08/07/2024.
Embaixador Boa Vontade Prezidente Republika ba Investimentu no komersiu iha rejiau Asia Ong Bang Poh Michael salienta, espera Primeiru-Ministru bele organiza atu hasoru malu ho Ministru sira iha Timor-Leste hodi koalia no diskute kona-ba setór no indústria ho detallu.
“Primeiru-Ministru orienta hela ha’u, atu hasoru malu ho Ministru sira hodi bele ko’alia no diskute kona-ba oportunidade investimentu hotu-hotu ho detallu”. Dehan nia.
Ong Bang Poh Michael akresenta, nia parte sei komunika ho ministériu relevante sira ne’ebé responsavel ba industria hodi propoin proposta detalladu ba Primeiru Ministru diskute iha Parlamentu Nasional.
“Ami prontu halo diskusaun, pasu tuir mai mak ko’alia ho ministru sira ne’ebé mak responsavel ba indústria oin-oin atu bele propoin proposta detalladu ida ba Primeiru-Ministru hodi aprezenta iha Parlamentu, karik projetu sira-ne’e ita bele hala’o”. Hakotu Ong Bang Poh Michael.
Jornalista: Genoveva Sarmento