Imajem : Karreta Bus Immortal Ne’ebe baku fila iha Luro,19/11/2024
SAPNewsTL, Lautém : Orseik lokraik haleu tuku lima, karreta bus ho marka Immortal diresaun Dili-Lospalos (Luro) sofre asidente iha Suku Lakawa, Postu Administrativu Luro, Munisípiu Lautém.
Xefe Suku Lakawa Abilio do Rosário informa bus refere baku fila tanba travaun la funsiona wainhira halai sa’e subida, kondutor mesak mak iha laran no la rezulta ema kanek no mate.
“Bus diresaun Dili-Lospalos ho naran Immortal baku fila iha Suku Lakawa, hafoin hatun passajeiru sira hosi Dili mai Lospalos(Luro), maka derepente mosu asidente tanba travaun la funsiona, asidente ne’e la rezulta ema kanek no mate”. Informa Xefe Suku Lakawa Abilio do Rosário ba SAPNews iha Luro,Lautém,19/11/2024.
Durante akontesimentu, Xefe Suku Lakawa hamutuk ho komunidade sira to’o kedas iha fatin akontesimentu hodi haree bus refere maibe ho grasa Maromak nian kondutor ne’ebé iha karreta laran mós kondisaun diak hela.
Hafoin bus ne’e baku fila, komunidade sira hamutuk ho karreta truck tolu hodi dada bus refere to’o hamrik fila fila iha dalan ninin tanba monu taka estrada klaran hodi difikulta movimentasaun veíkulu sira iha Lakawa.
“Hafoin asidente, ami hamutuk ho komunidade sira ba haree no ajuda hodi dada to’o bus ne’e hamrik fila fali iha dalan ninin”. Abilio do Rosário informa
Fo hanoin fali katak Bus Immortal transporte públiku ida hosi Postu Administrativu Laga Munisípiu Baukau nian ne’ebé halai ba diresaun Luro ba Dili hahú iha tinan 2024.
Jornalista : Ekipa Kobertura