Imajem : Komunikadu Imprensa husi Vigário Geral da Arquidiocese de Díli no Presidente da Comissão Téknika Superior da CET, Pe. Gracianos Santos Barros iha salaun São Sebastião, Balide, 06/06/2024.
SAPNewsTL, DÍLI – Ohin Conferência Episcopal Timorense (sigla Português, CET) preokupadu no lamenta teb-tebes konfrontu sira ne’ebé mosu iha areador Santuario Fátima, Portugal.
Conferêcia Episcopal Timorense (CET) preokupadu teb-tebes no lamenta ho konfrontu sira ne’ebé mosu iha madrugada domingu dia 2 junho 2024 iha arredor Santuáriu Fátima nian iha Portugal, ne’ebé kauza vitima mortal ida no balun kanek todan.
Tuir fonte kredível balun, vítima mortal mane ida ho tinan 25, no konfrontu ne’e envolve Timor-oan ho idade entre tinan 25 to’o tinan 30 mak baku-malu, maske seidauk hatene motivu lolós insidente ne’e nian.
“Ami, Bispo sira Timor ninian, manifesta ami nia laran-susar no la konkorda ho kualker forma violênsia la bele nafatin mosu iha sosiedade nia leet, liu-liu iha fatin sira hanesan Santuariu Fátima, Portugal”. Tenik Vigário Geral da Arquidiocese de Díli no Presidente da comissão Téknika superior da CET, Pe. Gracianos Santos Barros ba jornalista sira iha salaun São Sebastião, Balide, 06/06/2024.
Enkuantu, liu husi gestu públiku Conferência Episcopal Timorence (CET), halarak husu deskulpa ba povu Português, ba Conferência Episcopal Portuguesa, em partikular ba Dioseze Leiria no sarani sira hotu, no ba Mirador no peregrinu Santuario Fátima nian.
“Liu husi gestu públiku ida ne’e, ami husu deskulpa ba povu português, ba Conferência Episcopal Portuguesa, em particular ba Diocese Leiria ho nia sarani sira, ba morador no peregrinu sira Santuario Fátima nian, ba hahalok joven sira nian ne’ebé perturba ona hakmatek no sakralidade Santuariu Fátima nian”.Hateten Pe. Gracianos Santos Barros.
“Ami apela ba polísia judisiária Leiria nian atu investiga didiak episódiu konfrontu sira ne’e no ami hein rezultadu investigasaun nian, atu sira ne’e bele hetan julgamentu tuir lei sira em vigor”. Pe. Gracianos Santos Barros akresenta.
Pe. Gracianos Santos Barros apela ba joven sira ne’e atu konverte-aan no halakon ondas no espiral violensia nian, atu joven sira hotu, em geral atu moris tuir sira nia fiar sarani, respeita no hadomi malu no halibur hamutuk esforsu tomak atu halo buat di’ak iha rai ne’ebé de’it sira hela ba.
Entretantu, Amo Bispo nain tolu hola inisiativa hodi halo karta no haruka ba Bispo Portuguesa nian, Conferência Episcopal Portuguesa nian hodi husu deskulpa, ho inisiativa hanesan Timor-oan ba sarani no joven sira ne’ebé halo ona aktus sira ne’e, portantu karta ne’e haruka ona iha Loron 06 fulan Junho 2024 orseik.
Iha sorin seluk, Primeiru Ministru Kayrala Xanana Gusmão sente laran moras ba aktu violentu ne’ebe joven Timor oan halo iha Fátima, Portugal.
Xanana Gusmão afirma nia parte sei taka total atividade arte marsial no arte ritual iha Timor-Leste.
Jornalista : Marciana da Conceição