Imajem : Ambulánsia ne’ebe apoia hosi Provínsia Hunan China, Dili, 03/04/2025
SAPNewsTL, Díli : Repúblika Popular China apoiu tan viatura ambulánsia multifunsional tolu ba estadu Timor-Leste hodi melhora servisu Ministériu Saúde (MS) iha munisípiu Manatuto.
Iha diskursu Ministru Administrasaun Estatal (MAE) Tomas do Rosario Cabral hateten, doasaun viatura ambulánsia ne’e mai husi Provínsia Hunan Republika Popular China hodi hametin lasu amizade entre povu Timor-Leste ho povu Hunan.
“Apoiu ida ne’e husi Povu Provínsia Hunan China ba povu Manatuto Timor-Leste, apoiu ne’e uluk sira asina tiha akordu iha tempu maun bo’ot Xanana momentu sei Prezidenti Repúblika tanba lae ema hanoin katak apoiu ne’e ba deit Manatuto”. Dehan Ministru MAE Tomas Cabral liu husi nia diskursu iha resintu Ministériu Administrasaun Estatál Kaikoli, Quinta (03/04/2025)
Governante ne’e aprofunda doasaun viatura médiku ne’e hodi hametin koperasaun povu Munisípiu Manatuto ho povu Provínsia Hunan kona-ba estabelesimentu akordu sidades amigas entre povu Hunan ho povu Manatuto.
“Apoiu ne’e hanesan sidades amigas ka amizade tanba sira mai iha Timor-Leste, iha 2008 hahu akordu entre povu Hunan ho povu Manatuto, nune’e kontinuasaun ha’u asina akordu tolu no ikus ita halo komemorasaun 10 anus da koperasaun sidades amizade” Tenik nia.
Dirijente Ministériu Administrasaun Estatál Tomas hatutan, Iha fulan outubru tinan 2024 Provínsia Hunan Republika Popular China fó apoiu ambulánsia tolu (3) ba estadu Timor-Leste liu-husi Ministériu Saúde hodi dignifika serbisu saúde iha Ospitál Nasionál Guido Valadare (HNGV).
“Ambulánsia tolu simu iha fulan outubru tinan kotuk, iha ne’eba ita haree katak doasaun povu Provínsia Hunan ba iha Povu Manatuto, hanesan ohin embaixador dehan ami propoin ba sira bele halo alargamentu mós ba Munisípiu balun no agora sira nia tekniku nain ualu (8) iha hela Postu Natarbora Munisípiu Manatuto”.
Nia salienta, Programa ida ne’e provínsia Hunan laos de’it ba Ministériu Saúde maibé sira apoiu mós ba area agrikultura no produsaun, nune’e nia parte husu ba autoridade munisípiu sira atu bele orienta komunidade sira hala’o servisu.
“Autoridade sira iha munisípiu mak tenki jere ema nia apoiu ne’e tanba ema sei halo fiskalizasaun hodi haree katak ita uza duni apoiu ne’e ba ita nia nesesidade ka lae, entaun autoridade sira fó hanoin ba povu Manatuto rasik hametin amizade inklui dezenvolve mos sira nia an, nune’e ita hela de’it iha ne’eba sira sei fó asistensia alargamentu ba munisípiu ne’ebe ohin sira rasik apoiu hodi ajuda amizade ne’e atu la’o ho diak iha futuru,” Nia Dehan.
Loron hitu (7) fulan ne’e ekipa tekniku balun husi Provínsia Hunan Republika Popular China sei halo site visit mai Timor-Leste hodi fiskaliza prosesu implementasaun iha Munisípiu Manatuto ligadu ho apoiu sira ne’ebe fornese.
“Povu Hunan sei mai vizita Timor-Leste iha dia seti (7) ekipa ida husi Hunan sei mai vizita Manatuto hakat liu ba area, Rembor nian oinsa atu halo interkámbiu amizade hodi hametin lasu sidades amigas no halo fiskalizasaun ba programa sira iha Manatuto”.
Enkuantu, Reprezentante Embaixador China iha Timor-Leste Xu Danyang realsa, nia parte reprezenta povu provínsia Hunan hato’o agradese ba governu Timor-Leste tanba bele estabelese serbisu koperasaun entre povu nasaun rua ne’e, Nia Subliña.
“Ba serimónia termu entrega viatura ami agradese ba Ministériu Administrasaun Estatál, (MAE) Ministériu Saúde (MS) Timor-Leste no Munisípiu Manatuto ne’ebe apoiu maka’as ba saúde entre nasaun rua ne’e, husi provínsia Hunan ho munisípiu Manatuto nu’udar realizasaun ikus husi koperasaun no reflete amizade husi povu China no povu Timor-Leste”.
Nia fundamenta, koperasaun provinsial sai destake esensial entre nasaun rua hodi hametin lasu sidades amigas husi povu provínsia Hunan ho povu distritu Manatuto sai diak liu tan.
“Ikus ne’e relasaun amizade entre China ho Timor-Leste iha progresu bo’ot hodi hametin amizade entre provínsia Hunan ho distritu Manatuto sei besik liu tan, tuir komprimisiu akordu ne’ebe antes ne’e estadu rua funda ona”.
Xu Danyang aprofunda, kooperasaun provínsial sai hanesan destake ida entre China no Timor-Leste iha area oioin, tanba nesesidade urjente povu Timor-Leste nian no mós reflete China nia apoiu ba Timor no firme ba dezenvolvimentu kuidadu mediku Timor-Leste nian signifika katak viatura sira ne’e bele ajuda hasa’e atendementu mediku iha munisípiu Manatuto
“Iha fulan outubru tinan kotuk Ministru Tomas Cabral lori Prezidenti Autoridade Munisípiu sira hamutuk nain hitu (7) hodi ba vizita provínsia Hunan ligadu ho koperasaun entre povu Hunan ho Timor-Leste entaun ami hasoru malu iha neba kolia ho povu Hunan”
Tuir planu ne’ebe reprezentante embaixador China dehan iha loron hirak tuir mai Primeiru-Ministru (PM) Kay Rala Xanana Gusmão sei lidera delegasaun ida husi Timor-Leste hodi ba vizita fali provínsia Hunan.
Nia subliña Provínsia Hunan Republika Popular China iha komitmentu hodi kontinua doasaun ba Timor-Leste hodi hametin koperasaun ida ne’ebe forti diak ba povu sira
“Embaixada China sei servisu maka’as ho Ministériu Administrasaun Estatál, Ministériu Saúde no Munisípiu Manatuto hodi promove koperasaun ne’ebe bo’ot liu tan saúde provinsial no lokal entre nasaun rua ne’e” Nia hakotu.
Iha fatin hanesan, Prezidenti Autoridade Munisípiu Manatuto (PAM) Luis Fernandes deklara, nia parte reprezenta povu munisípiu Manatuto hato’o profundu ba governu China ne’ebe oferese ona apoiu ba povu Manatuto
“Hodi populasaun Manatuto nia naran hakarak agradese ba governu China husi provínsia Hunan ne’ebe antes ne’e kria tiha ona amizade entre povu Hunan ho povu Manatuto iha tinan 10 ba kotuk agora atu tama ba tinan 11” Dehan nia.
PAM Manatuto dehan, ho doasaun ambulánsia tolu ne’e aumenta tan lista lubuk bo’ot ida ne’ebe munisípiu Manatuto simu ona husi Provínsia Hunan Republika Popular China iha tinan hirak ba kotuk hodi promove koperasaun provinsial.
“Primeiru sira dezenvolve relasaun hamutuk ho munisípiu Manatuto hodi apoiu setor agrikultura fulan kotuk ami simu tan makina perfurasaun bee moos ida agora munisípiu Manatuto simu tan ambulánsia, ne’ebe lista lubuk bo’ot ida husi provínsia Hunan hatudu sentidu katak sidade amigu entre munisípiu Manatuto ho provínsia Hunan,
Nia salienta, durante koperasaun la’o povu Manatuto seidauk fó apoiu ba provínsia Hunan maibé povu Manatuto loke fuan ho laran ba Universitariu sira atu halo peskiza iha area Manatuto nian.
“Ami seidauk fornese saida mak Manatuto halo ba Hunan infelismente ami nia proposta atu husu ba governu Hunan karik iha universitariu sira hakarak ba peskiza iha Manatuto ami nia odamatan nakloke”
Entretantu, iha serimónia entrega viatura ambulánsia ne’e partisipa husi Ministra Saúde, Ellia Amaral, Ministru Administrasaun Estatál Thomas Cabral, Vice- Ministru MAE Jacinto Rigoberto, Sekretáriu Dezenvolvimentu lokal, Sekretáriu Estadu SEATOU, Prezidenti Autoridade Munisípiu Manatuto (PAM), Xefi Suku Eleitu, Padre komvidadus no média sira
Jornalista : Guilhermino Ramos da Cruz