Imajem : Eis Primeiru Ministru Marí Bin Amude Alkatiri hamutuk ho Ezekutivu SAPNews iha Farol, Dili,20/02/2025. Foto : Daniel da Silva
SAPNewsTL, Dili : Konseleira no Ezekutivu Mídia SAPNewsTL hala’o audiensia ho Eis Primeiru Ministru Marí Bin Amude Alkatiri, objetivu hosi sorumutu ne’e hodi rona opiniaun no konvida ofisialmente halo palestra kona-ba “Papel Média Iha Libertasaun Povu : Entre Dejafiu, Ameasa no Oportunidade.
Durante sorumutu, Eis Primeiru Ministru Mari Alkatiri hateten jovens tenki iha inisiativa rasik no hari’i ninia futuru tanba to’o jerasaun tuan sira sei husik hela rai ne’e ba jerasaun foun sira.
“Ha’u apresia tebes imi, mesak joven ne’ebe iha inisiativa rasik no hari’i futuru, parabens ba imi tanba imi bele halo tinan tolu, ha’u sei ko’alia buat barak iha imi nia aniversariu”. Tenik Eis Primeiru Ministru (PM) Mari Alkatiri iha Farol Dili,20/02/2025
Mari Alkatiri dehan, atu hari’i media ne’ebe la fasil maibe imi bele hari’i tanba imi iha inisiativa diak, kontinua ba oin, “imi presiza honestu, honestu ne’e tenki iha frontalidade, intelektual ne’ebé laiha honestidade ne’e oportunista”. Nia sublinha
Imajem : Eis Primeiru Ministru Marí Bin Amude Alkatiri
Ligadu ho konvite SAPNews, Eis Titular ne’e afirma nia parte sei tau iha ajenda no marka presenza hodi halo palestra ba jovens sira iha Timor-Leste no iha ema nia rain.
“Ohin imi apresenta katak hakerek revista no atu lansa ne’e diak no importante, apresia ba imi nia esforsu”. Nia hateten
Konseleira SAPNews Judite Dias Ximenes haktuir SAPNews hari’i hosi fetoran no mane klosan sira, to’o ohin loron halo ona tinan tolu maibe kontinua ho ispíritu patriotismu, nasionalismu no voluntarismu.
“SAPNews ne’e idéntiku ho juventude ne’ebe nakonu ho ispiritu nasionalismu, patriotismu no voluntáriu, bainhira halo tinan rua sira konvida ami sai konseleira, ohin ami akompanha no tau matan ba sira”. Nia dehan
Iha fatin hanesan, Prezidente SAPNews Clementino Bragança Machado ho laran ksolok fo agradese ba Marí Alkatiri tanba bele iha disponibilidade hodi simu audiensia no aseita hodi hola parte iha aniversariu no lansamentu revista Papa Francisco ne’ebé sei hala’o iha loron 26 fulan Fevereiru 2025.
“Agradese wa’in tebes ba Eis PM tanba bele simu ami, rona ami nia hanoin no aseita ami nia konvite hodi partisipa iha ami nia aniversáriu SAPNews ba dala tolu hodi lansa revista, filmajem, no halo palestra kona ba “Papel Mídia Iha Libertasaun Povu : Entre Dejafiu, Ameasa no Oportunidade”. Hateten Clementino Bragança
Midia SAPNewsTL nu’udar obra juvenil, estudantil, no akadémiku ne’ebé hari’i hodi formandu jornalismu profisional, estudante universitáriu sira no finalista sekundáriu sira ne’ebé hari’i ho vizaun atu atinji sosiedade TL ne’ebe informativu, inspirativu, konstrutivu, krítiku, produtivu no edukativu hodi hametin no haburad konstrusaun estadu de direitu no demokrátiku.
Jornalista : Ekipa Kobertura