Dalan Ba Maromak Mizerikordiozu, Kuaresma Tempu Hadera-an no Arrependementu

SAPNewsTL, Lautem: Amo Pároco Nossa Senhora Rainha dos Apóstolos de Luro Pe. Augusto Delfim de Sá hateten tempu kuaresma hanesan tempu oportunu, tempu hadera-an no tempu arrependementu tanba ne’e nia husu ba sarani sira atu rekuñese nia an no fila fali ba maromak ne’ebe nu’udar maromak mizerikordiozu.

Iha intervista ho Amo Pároco Nossa Senhora Rainha dos Apóstolos de Luro Pe. Augusto Delfim de Sá haktuir tempu kuaresma ne’e nu’udár tempu no oportunidade ba sarani hotu atu rekuñese sira nia an hodi hakbesik fila fali ba maromak

“Kuaresma ne’e tempu ida oportunu, tempu forte ba ita ema sarani hotu, importante mak ne’e nakfila ita nia laran, katak ita nia hahalok durante ne’e moris latuir ita nia Na’i maromak ninia vontade i ita arrepende ita nia sala hodi fila fali ba Maromak, ida ne’e mak  importante liu, tan Nia domin ba ita rohan laek i ita buka fila fali ba Nia, Nia loke nia liman ba ita ho domin perdaun no laran sadia”. Tuir Amo Pároco Nossa Senhora Rainha dos Apóstolos de Luro Pe. Augusto Delfim de Sá, hafoin missa Kuarta-Feira Sinzas iha Parokia Luro, Kuarta-Feira, 22/02/2023.

Amo Paroco ne’e hatutan,kondisaun importante hanesan ema sarani iha loron haat nulu  no kalan haat nulu nia laran mak prepara sira nia fuan ho laran liu husi sira nia konversaun hakbesik ba sakramentu rekonsillasaun hodi hadame ho Na’i maromak no sira nia maun alin sira ne’ebé iha sira  nia sosiedade,nu’udár ema sarani.

“Hakbesik mai sakramentu rekonsiliasaun, ida ne’e mak importante iha ita ema sarani nia vida, rikusoin ida bo’ot liu mak Maromak hadomi ita laiha rohan, tanba ne’e oferese sakramentu konfesa grasa no perdaun husi Maromak mai ita, tanba ne’e sarani doben sira labele tauk keta neon kraik hakbesik ba sakramentu konfesa iha tempu forte ne’ebé paroquia ida-idak iha Timor sei oferese tempu ba sakramentu rekonsillasaun ba sarani sira iha idak-idak nia fatin”. Nia hateten

Entretantu, Padre Pároco ne’e husu ba sarani sira hotu atu fila fali ba maromak tanba maromak  la haree ba ita nia pasadu no labele laran triste maromak laran luak sempre iha ba nia oan sira ne’ebé tempu kuaresma ne’e nu’udar tempu hadera-an no arrependimentu.

“Tempu kuaresma hanesan tempu hader-an nian no tempu arrependementu, hotu-hotu rekoñese ita nia an iha Na’i Maromak nia futar oin ita fila fali ba nia, tanba ita nia Maromak lahare ba ita nia pasadu, ita nia prezente no futuru, labele hateke ba sala sira iha kotuk maibe ita hateke ba kotuk hodi mai konfesa, ita mai fila fali ba Nia”. Nia hakotu

Jornalista: Luis Pailofo