Imajem : João Choque iha Madoru, Dili, 28/01/2025
SAPNewsTL, Dili – Relasiona ho resignasaun husi Prezidente Autoridade Munisípiu Dili (PAM-Dili) Gregorio Saldanha Mouris, Joven Resisténsia João Choque konsidera foti dezisaun regina an tanba kaer prinsipiu resisténsia katak integridade nasaun nian boot liu interese ema ida nian.
João Choque hateten, Gregorio nia prinsipiu defende ne’ebé 24 anos, povu mak sai prioridade liu laos interese ema ida, tenke foti desizaun, ema rezistensia prinsipiu kuda kedas defende ema laos defende interese ema ida nian.
“Ema rezisténsia prinsipiu kuda iha fuan, loos dehan loos, sala dehan sala, desizaun ne’ebe foti ne’e loos no sai ezemplar ida ba jerasaun sira tuir mai, se ita kontinua hanesan ne’e nasaun sei la ba oin, 24 anus ita sei la halo ahi-kose no daun”. Dehan João Choque ba jornalista iha Dili, 28/01/2025.
João akresenta, “Dalaruma 24 anus mai nasaun ema seluk mak sei ukun, tanba ita soe ona prinsipiu esensial no defende ema ida-idak nian laos interese ema barak nian.
“Nasaun ne’e ema barak mate, nasaun ne’e ema funu laos tanba interese ema ida nian, nasaun ne’e ema hotu luta brani fo aan ba mate hodi defende povu ida ne’e, povu ne’ebe sakrifika aan, dalaruma uma laran tomak mate hotu balun to’o agora fitar funu sei iha”.
Joven resisténsia ne’e dehan sidadaun sira presiza brani hodi dehan los ba ba buat ne’ebé los, dehan sala ba buat ne’ebé sala iha Timor-Leste.
“Hatete loos ba lialoos, hatete sala ba lia sala, husik kargu tanba defende buat ne’ebe nia sente dehan loos. Ema ida maka iha knaar boot, nia laiha kompeténsia polítika, nia mos lakohi sai hanesan ema ida ne’ebe la kontribui buat ida”. Nia sublinha
Choque fo parabens ba Gregorio Saldanha tanba hatudu ezemplu diak ba jerasaun foun hodi husik interese individu no tau aas interese povu nian ne’ebé defende durante tinan 24.
“Ha’u fo parabens tanba nia sai ezemplu diak ida ba jerasaun tuir mai, atu jerasaun sira foti medida foun hodi hateten loos tenke tau iha nia fatin, sala tenke tau iha nia fatin, husik hotu interese individu nian tenke fo interese liu ba povu”.
“Ema resisténsia ida responsabiliza asaun ida naran masakre santa kruz. Tama kadeia kastigu iha ne’ebá ne’e mak prinsipiu ema rezistensia nian ne’ebe puru laos rezistênsia ne’ebe foin fila hosi kupan mai, la’os rezistensia ne’ebe 1999 foin hakfodak ukun aan ne’e diak. Rezisténsia ne’ebe oferese aan tomak atu defende povu ne’e mak foin prinsipiu ida lolos”.
Aleinde ne’e, João Choque konsidera despezu administrativu ne’ebé Sekretariu Estadu Asuntu Toponomia no Organizasaun Urbanu (SEATOU) halo la dignifika povu ne’ebé uluk defende tanba ne’e Gregorio Saldanha defende nia integridade hodi husik knaar.
“Despezu administrativu sein dignidade no la dignifika povu ne’ebe uluk nia defende ne’e problema boot, nia sensibilidade humana boot liu nia interese hodi kaer ukun. Nia fo ezemplu katak integridade ne’e boot liu buat hotu ne’ebe iha ita nia rai, ko’alia, hanoin no asaun tenke hala’o hanesan”. Nia hakotu
Eis PAM-Dili Gregorio Saldanha Mouris deside resigna an husi kargu Prezidente Autoridade Munisipál Dili (PAM-Dili) tanba kauza hosi irregularidade administrativu no falta autonomia nu’udar PAM-Dili hafoin kaer kargu durante besik tinan 1 (01/03/2024-28/01/2025)
Tuir komunikadu ne’ebé SAP News TL liu hosi Ministériu Administrasaun Estatál (MAE) katak MAE realiza ona serimónia termu entrega kna’ar no funsaun hanesan Prezidente Autoridade Munisipiu Dili, tuir karta rezignasaun ne’ebé apresenta hosi PAM sesante, Gregorio Saldanha Mouris.
Serimónia termu entrega refere realiza bazeia ba karta aprezenta pedidu renúnsia kargu Prezidente Autoridade Munisipal Dili, tanba situasaun kritiku sira iha Autoridade Munisipal Dili, hanesan :
1. “Intensaun atu transfere Unidade Jestaun Projetu (PMU) husi Autoridade Munisípiu Dili (AMD) ba Ministériu Administrasaun Estatál (MAE) tau iha risku fiskalizasaun tékniku servisu limpeza urbana iha Dili, nomeadamente jestaun solidu munisipal lixu (MSW) no rekolla lixu manuál, tanba AMD depende krusialmente ba sira-nia apoiu”
2. “Prolongamentu kontratu ba empreza limpeza urbana husi MAE, sem komunikasaun previa ho Autoridade Munisipiu Dili, maske empreza hirak ne’e ida tama iha “lista metan” iha Autoridade Munisipal Dili (AMD) tanba desobediénsia no abandona kna’ar durante semana ida”.
3. “Maske AMD nian atu hadi’a dezempeñu empreza limpeza sira nian, inklui akizisaun veíkulu foun sira hodi transporta lixu, no preparasaun prosesu selesaun foun ba tinan 2025, desizaun sira ne’ebé MAE halo kompromete ami-nia esforsu sira”.
4. “Hasai autoridade AMD nian kona-ba GMT (Jestaun Merkadu no Turizmu). Uluk iha ámbitu SEATOU nian, hamosu ona problema sira. Iha jestaun SEATOU nian, GMT hala’o aktu violénsia no na’ok hasoru vendedór ambulante sira no rezidente sira, lahó koñesimentu ka kontrolu hosi AMD, hodi hamosu atribuisaun responsabilidade sira ne’ebé la justu ba nia”.
5. “Nu’udar sidadaun, veteranu no PMA, Ha’u deklara Ha’u-nia opozisaun maka’as ba despeju no espulsaun rezidente no vendedór ambulante sira sein kria kondisaun mínimu, liuliu iha tempu udan, maski sira okupa espasu públiku sira. Ha’u konsidera prátika ida-ne’e hanesan kustu boot tebetebes ba povu Timor-Leste, ne’ebé, maski durante okupasaun Indonézia, kontribui ho desizivu ba luta ba independénsia”.
Imajem : Eis PAM-Dili Grigorio da Cunha Saldanha Mouris iha Matadoru,28/01/2025
Bazeia kestaun hirak temi iha leten, Gregorio Saldanha Mouris deklara katak :
1. “Iha ha’u-nia pozisaun nu’udar PAM, falta autonomia administrativa, tanba AMD nia dependénsia maka’as ba MAE, impede Ha’u atu asegura preparasaun nesesária ba desentralizasaun governu lokál, hanesan estabelese husi polítika IX Governu Konstitusionál”.
2. “Ha’u-nia preokupasaun mak ema konsidera nu’udar adversáriu ka inimigu husi polítiku ba IX Governu”.
3. “Dezde Ha’u simu pose, Ha’u ho Ha’u-nia ekipa servisu hodi hadi’a AMD, kombate indisipliña, korupsaun, nepotismu no prátika familiár, tuir kompromisiu sira husi Governu Konstitusional da-sia, maibé infelizmente, obstákulu sira ne’ebé ami hasoru”.
4. “Maibé, esforsu atu halo auditoria (daudaun ne’e la’o daudaun) bele hamosu konflitu ho figura sira ne’ebé iha influénsia”.
“Sente hanesan la hetan apoiu institusionál hodi kumpri promesa sira ne’ebé ita halo ona ba povu Timor Leste, liu-liu kapitál Díli. Nune’e, halo ha’u-nia prezensa iha kargu PAM Díli ne’e, la sustentável ona atu kuntinua.” Tenik Eis PAM-Dili Gregorio da Cunha Saldanha Mouris ba Jornalista sira iha Matadouro, 28/01/2025
Saldanha hatutan, “Maski nune’e, hau nia dever atu hato’o ha’u-nia agradesimentu ba fiar no kolaborasaun husi ha’u-nia kolega sira iha AMD, husi ha’u-nia superiór sira iha MAE no Governu IX, iha lideransa Maun Boot Xanana Gusmão.”
“Ikus, ha’u hakarak husu deskulpa ba povu sidade Díli tamba ha’u tenki para iha dalan klaran, maski iha ona planu oinsá dezenvolve sidade Díli ba oin kona ba lixu, merkadu, rate, jardin, no atendimentu sira seluk ba komunidade nia nesesidade sira. Nune’e, dala ida tan ha’u deklara ba públiku ha’u nia Rezignasaun nu’udar PAM Díli”.
Eis PAM Dili ne’e husu PAM foun hodi servisu makaas no lolos hodi lori mudansa no dezenvolvimentu sidade Dili.
“Ha’u deseja susesu ba PAM foun atu kontinua serbisu lailais maibé lolos hodi lori mudansa sira, no afirma ha’u nia kompromisu ba dezenvolvimentu sidade Dili, no moris diak ba sidadaun sira hotu”. Nia hakotu
Fo hanoin fali katak Gregorio da Cunha Saldanha Mouris asume kargu Prezidente Autoridade Munisipiu Dili iha loron 1 fulan Marsu tinan 2024, submete nia karta resignasaun iha loron 13 fulan Janeiru 2025 no ofisialmente husik kargu iha loron 28 fulan janeiru 2025.
Serimonia entrega funsaun ne’e hala’o fo biban ba nomeiasaun foun husi Primeiru Ministru, bazeia ba dispozisaun nú 1 artigu 21, husi Dekretu-Lei nú 3/2016, loron 16 fulan-marsu, ne’ebé publika fila fali husi Dekretu-Lei nú. 84/2023, loron 23 fulan-novembru, kompeténsia atu nomeia no ezonera ba Prezidente Autoridade Munisipál sira eskluzivu ba Sua Exelénsia Primeiru-Ministru.
Daudaun ne’e Diretor Jeral Antonio A. Guterres asume kargu hanesan Prezidente Autoridade Munisipiu Dili interinu hodi hein nomeasaun foun hosi Primeiru Ministru Kayrala Xanana Gusmão.
Jornalista : Ermelinda Soares