Imajem : Lourenço Cai da Graça hala’o komunikadu imprensa iha Jardim 5 Maio, 25/06/2025
SAPNewsTL, Dili : Relasiona ho kazu na’ok sasan ne’ebe deskonfia envolve feto, Lourença Cai deklara la hola parte iha kazu na’ok husi Grupu Nakro no Tata.
Ekipa Kobertura – Mídia Sapnews
Lorença Cai da Grasa Sarmentu hatete katak sira la’os na’okten maske Polísia Nasional Timor-Leste PNTL) ba kaptura sira hodi submete ba prosesu investigasaun.
“Polisia sira ba kaer ami iha kasnafar, sira nia tujuan ne’e ba buka alin mane Aldo ne’ebe envolve naok sasan iha Fatuhada foin lais ne’e ne’e”.
“Iha momentu ne’e Polísia la hetan ona sira, entaun kaer fali ami, maibe durante iha ne’eba ne’e oan mane Aldo ne’e laiha ne’eba, labarik ne’e nunka tama uma, loron ami ba servisu, loraik sai servisu mai ne’e vizinhu sira foin hatene Aldo ho nia maluk mai halimar iha ne’e, dader ami ba tiha servisu mak nia foin ba, to’o oras sai servisu entaun nia lakon ona, labarik la besik uma ida, ami ba tiha servisu foin nia tama”, Dehan Lorença Cai da Graça ba jornalista sira iha Jardím 5 Maio, 25/06/2025.
Lourença klarifika, nia parte laiha kunhesimentu kona-ba kazu na’ok sasan maibe derepente deit Polísia ba kaptura no lori sira ba eskuarda PNTL Dom Aleixo hodi submete ba prosesu investigasaun.
“Momentu sira halo problema ne’e ami la hatene buat ida, ami iha uma tur halimar hela, iha kalan sira sa’e ba kaer ami, ami lahatene buat ida sira lori tun mai kantor Polísia, balun hatete ami hanesan, feto na’ok, ha’u hakfodak, ha’u la hatene buat ida”.
Lourença hatutan, “buat hotu-hotu ami deklara lo’os tiha ona iha ne’eba, ema ida na’ok te’en ne’e mos ema kaer lori mai hotu ona, soke sira fo sai ema sira na’ok te’en ne’e nia foto iha media, sira fo fali ami ida la envolve iha kazu ne’e nia foto mak iha media, iha ne’e hakarak klarifika de’it ami ne’e la’os na’ok te’en”.Dehan nia
Lourença dehan wainhira kilat tarutu, sira hakfodak halai tama ba kuartu laran, hafoin Polísia sira ba haruka sira sai hosi kuarta no dehan “feto na’okten ne’e horibainruak imi sobu se nia loza”.
“Polisi sira ba tiru kilat tarutu, ami mos tur hela iha uma oin, ho hakfodak ho alin mane sira halai tama kuartu tanba ami mos lahatene buat ida. Sira haruka ami sai husi kuartu sira hatete haree feto ida ibun bo’ot ne’e kaer lori hotu tun ba, to’o tiha kantor Polísia sira dehan ‘feto na’ok te’en ne’e horibainruak imi sobu se nia loja’, maibe ami la hatene buat ida”. Nia konta
Nia konta, “Labarik sira na’ok te’en ne’e hamutuk na’in lima mak tama sobu loja ne’e, ida ne’e mak ami la hatene tamba ami sai servisu ba ema dehan de’it hanesan ne’e Aldo ho nia maluk sira mak mai halimar iha ne’e, to’o iha kantor Polísia mak ami foin hatene Aldo ne’e xefe bo’ot ida kona-ba na’ok te’en (Aldo, Ebhy, Kaka, Dani, Fiki).
“Sira nain tolu mak entrega an ona, hela Aldo ho Deni mak to’o agora sira sei buka, maibe seidauk hetan, Aldo ne’e mak bin nia oan, labarik hanesan ransu la besik tiha uma, Aldo nia Apa, Ama iha kasnafar hotu”Teni nia.
Entertantu, Lorença klarika katak nia la’os na’okten, nia iha servisu lorloron tanba ne’e nia husu ba públiku hodi hamos ninia imajem iha media sosial, “wainhira espalla nafatin, ha’u sei keixa ba PCIC (Polícia Científica Investigação Criminal) hodi buka tuir”.
Fo hanoin fali katak, Serviço Relações Públicas (SRP) liu hosi ekipa konjunta asegura suspeitu na’in hitu kompostu hosi mane na’in neen no feto ida iha kapital Díli tanba envolve iha kazu naok sasan.
“Suspeitu hirak ne’e ho naran MAF, CL alias Ambeli, JDSA alias Kusu, JT, DSX alias Anizu, no-mos LCDS ne’ebe komete kazu naok iha area Fatuhada, Aldeia Laloran, Suku Bairo-Pite, Postu-Administrativu Dom-Aleixo, Munisipiu Dili”. Sita Página ofisial Facebook Serviço Relações Públicas iha Dili, 23/06/2025.
Hafoin remata identifikasaun, iha loron tuir mai ekipa servisu asegura tan suspeitu nain-1 ho naran YCS alias Eby iha area Bebora ho evidensia telefone marka Samsung S22 no balu fa’an ona ba ema seluk no-mos suspeitu seluk tan.
Tuir deklarasaun Eby katak, nia ho nia kolega nain-4 hein iha loja liur parte kotuk hodi kontrola situasaun, enkuantu nain-4 maka falun oin metin tama ba iha loja laran hodi naok no lalin sasan sira sai ba liur.
Vitima Chen Jizuo, iha nia deklarasaun katak liu hosi kamara vizilansia indika ema deskuñesidu uza ai suak selok portaun loja nian tama ba loja laran hodi foti sasan hirak ne’e nia la hatene no wainhira hader haree katak odamatan loja nian nakloke no telefone ne’ebe arma iha etalase laran ema naok hotu ona.
Tuir nia, sasan hirak ne’ebe lakon, maka hanesan, iPhone14 total 20, iPhone13 total 2, iPhone 12 Pro Max 2, iPhone 6S 10, Samsung S22 total 2, Samsung S21 total 3, Samsung S20 total 3, Samsung S9 total 2, Awesone A70 total 2 no-mos Laptop ThinkPad 1.
Antes ne’e, ekipa konjunta kompostu hosi Makikit, Araña junta ho FP (Forsa Polisia) buka tuir autór sira ba krime públiku ekipa servisu konsege asegura joven-8 ne’ebé envolve iha Grupo rua ho naran NAKRO (Naok Ten Kronik ) ho TATA, hodi sobu loja hodi naok sasan iha area Fatuhada.
“Suspeitu nain 8 ne’ebe servisu koordenada hodi naok maka hanesan AV alias Tinu fender, nu’udar xefi ekipa NAKRO, ADSG alias Antonio gang 45, DP alias Mizio/Kozi, IG alias Kaka, Fiki Soares alais Afiki Gang 45”.
“FSD alias Riki Tohar, JF alias Jose pelatih no-mos EV alias Viana ho evidensia telefone ne’ebe maka ekipa rekolla husi suspeitu sira hamutuk 13 ho marka Iphone 6, Samsung 6, Awesone 1”. Sita Página Serviço Relações Públicas iha Díli, 23/06/2025.
Iha prosesu identifikasaun suspeitu sira koopera di’ak hodi deklara entre suspeitu sira ne’e sei falta suspeitu nain rua ho naran Aldo nudar Xefi Grupu Naok ho naran TATA ho nia membru naran Ramadhan maka seidauk asegura tanba sira nain 2 lori evidensia telefone 36 ho laptop 1 halai ses ona hosi nia rezidensia iha Dili ba fatin seluk tanba sira nia rede iha mos Munisipiu seluk.
Ekipa servisu ne’ebe dirije husi Xefi Departamentu Informasaun no Kontra Informasaun hamutuk ho Makikit 1, dezenvolve kazu ne’e konsege identifika suspeitu balu sei iha tan.
“Nune’e ekipa sei kontinua halo vizilansia hodi buka tuir. Enkuantu Komandu Operasaun mos haforsa vizilansia no hasai ona ordem ba membru sekreta sira hodi buka tuir suspeitu sira nia paradeiru tanba sira nia rede estabelese ona iha Munisipiu”.
Polisia lori sira ba Eskuarda PNTL Dom Aleixo, iha loron 23 Junhu 2025, sira tama sela durante horas 12 (09:07-04:00), hafoin submete sira ba halo investigasaun.
Enkuantu, kazu na’ok sasan no sasan lakon akontese dala barak ona iha kapital Díli, to’o oras ne’e parte relevante sira seidauk bele lori satan no trava.
Foto : Ekipa SAPNews & Serviço Relações Públicas