Imajem : Deputadu Bankada FRETILIN David Dias Mandati iha PN, 20/11/2024. Foto : Media PM
SAPNews TL, Díli — Iha ambitu faze diskusaun final global Orsamentu Jerál Estadu (OJE) tinan 2025 reprezentante povu iha uma fukun Parlamentu Nasional (PN) Bankada Frente Revolucionaria de Timor-Leste Independente
(FRETILIN) David Mandati Dias Ximenes, ho laran triste deklara, Xanana ida uluk iha tempu rezistensia diferente ho Xanana ida agora.
Deputadu Bankada FRETILIN David Mandati Dias Ximenes hateten, bainhira nia parte partisipa iha debate (OJE) tinan 2025 faze espesialidade, to’o finalidade, nia parte avalika katak, Irmão e companheiro da Luta, Xanana Gusmão, nia postura iha pasadu diferente los ho tempu Timor-Leste iha faze ukun raik an.
“Ha’u akompaña debate orsamentu tinan 2025 nian ho ita bo’ot nia postura ne’ebé hatudu desde inisiu to’o remata, afinal ha’u monu iha falsa impresaun ha’u nian rasik. Ha’u hanoin katak ita bo’ot nafatin ida ne’ebe ha’u kuñese, maibe ha’u sala. Ita boot diferente tebes ho ida ne’ebe ha’u kuñese iha tempu difisil nian laran” Deklara Deputadu FRETILIN David Dias Mandati, Quarta (20/11/2024)
Nia dehan, Irmaun, 24 anos ona mak Timor-Leste livre husi kolonialismu no invazaun nia okos, 22 anos mak povu moris no esprimenta ukun rasik-an ne’ebe uluk povu rasik defende hamutuk, durante 22 anos kaer rasik kuda talin, oituan ka barak ema hotu partisipa, diak no at, ita liu hamutuk, iha previlejiu ida ukun no governa barak liu, liu tinan 14.
“Ho osan ne’ebe Maromak fo mai ita liu husi petróleu, ita gasta ona 20 billiaun resin. Maibé saida mak ita haree agora. Ema oituan derepente sai milionariu no barak liu nani hela iha oseania mizeria nia laran, atu han deit loron ida mos susar ba sira. Irmaun, ida ne’e mak uluk ita mehi atu hetan iha ukun rasik-an, ita sai husi analfabetu estrutural tama fali ba analfabetu funsional, katak ita nian oan sira hatene alfabetu maibé la hatene nia funsaun”.
Deputadu David hatutan, kualidade edukasaun iha eskola publika a’at ba bebeik, maibé grupu kiik ida nia oan hetan eskola diak ba bebeik, ida ne’e mak objetivu husi povu nia luta durante periodu moruk nia laran hasoru kolonialismu no invazaun, hodi hetan independente total.
“Ita nia luta, ita sakrifika tiha ona jerasaun ida ka rua iha funu laran, agora ita sakrifika tan jerasaun rua iha tempu indepedensia, tanba sa tenki sakrifika tan sira iha tempu ida agora,
Iha asistensia saúde, ita haree, ema iha osan no ita ukun nain-sira hetan tratamentu diak, husik povu maioria lahetan asistensia saude ida diak”.
Nia salienta, desde Timor-Leste hetan independensia Timor maioria, dependensia ba prodotu sira ne’ebe importa mai husi nasaun Indonesia, Governante sira uza osan povu nian hodi hala’o viazen ba estranjeiru, vizita ema nia nasaun, maibé laiha politika hodi implementa matenek ne’ebe sira hetan iha ema nia nasaun iha nia rain rasik.
“Ohin loron iha ita boot nia Governu duni, ba hakanauk ai-moruk iha Atambua, Kupang hanesan aldeia ida husi Indonesia, ida ne’e mak uluk mehi ba Indepedensia, ita importa ai-han barak liu do que ita produs rasik, pior liutan importa husi Atambua no Kupang, turismu ne’ebe ita bele aproveita, maibe la iha, ita asiste mak Governante no funsionariu sira semo ho osan estadu nian hodi sai turista ba ema nia rain, barak liu iha Bali, Indonezia. Em vez de lori turista mai ita nian rain”.
Nia afirma, hanesan Timoroan senti tauk no triste, tamba rai-ida ne’ebe hari’i hamutuk, hodi heroi rihun ba rihun nia mate ne’e, politikamente bolu Timor-Leste, maibe ekonomikamente nafatin Timor-Timur ka Tim-Tim, tanba povu la hatene senariu ka ajenda ruma ne’ebe prepara hela, depois de funu remata.
“Ita boot iha amigo foun no haleu ho ema oin-oin, ami sira ne’ebe uluk ita kuñese malu no la’o hamutuk iha tempu difisil, hateke no akompaña husi dook deit, ha’u nia irmaun, Xanana ida uluk ha’u kuñese no tuir, diferenta dook los ho Xanana ida agora ha’u hasoru. Iha liur, hakuak malu ho ita nia funu maluk, em nome rekonsiliasaun. Iha rai lara, fo sala, atira kulpa, ko’alia at, hatun, diskrimina sira seluk, ne’ebe uluk oituan ka barak defende mos rai ida ne’e”. Nia sublinha
David Mandati akresenta, iha pasadu mak funu nain FALINTIL sira la iha unidade, laiha serteza ba ukun rasin an, tamba diverzensia politika ne’ebe la hanesan, maibé funu nain kria unidu mak rezultadu ba independensia Timor-Leste nian, ho kapasidade, estratejia no politika ne’ebe organizadu uniku no forte.
“Uluk mak ita halo hanesan ne’e ba malu, funu seidauk hotu, uluk ita iha diferensa duni, até ho ita nia diferensa sira ajuda ita hetan solusaun kriativa no efikas. Tanba uluk ita hatene jere ita nia diferensa no iha kapasidade atu deskobre buat ne’ebe hanesan no komun entre ita, hodi hakat liu dezafiu sira hamutuk no manan ukun rasik-an, maibé ohin loron, oin seluk fali, ita explora diferensa sira hodi inventa inimigu entre ita rasik, tempu kala muda duni ona, ha’u mak nostaljia demais. Los duni hanesan ema sabio sira dehan: poder, osan no buat prazeres pesoal, bele muda ema ida nia hahalok”.
Nia Dehan, liu husi debate OJE Primeiru-Ministru rasik deklara katak, orsamentu ne’ebe Timor-Leste dependensia ba petroleu sei la dura ba tempu naruk, ho rajaun rekursu ne’ebe Timor-Leste iha hanesan petroleu, hahu menus ba beibeik, iha dekada tuir mai bele hotu.
“Primeiru Ministru, Companheiro da luta, horseik hodi bainrua, iha debate orsamentu ida ne’e duni, ita boot rasik hatete, osan husi petroleu sei remata iha dekada ida tuir mai, seidauk iha serteza kona-ba osan foun ba ita nia rain, ita bo’ot rasik rekoñese katak kadoras mina nian atu mai Timor-Leste la’os buat fasil, desde tinan 2011, ita hahu halo impréstimu husi rai seluk, to’o agora ita iha tusan 1.2 billiaun dolar Amerikanu, ne’ebe ita sei husik ba ita nia oan no bei-oan sira atu tutur no selu aban bain-rua”.
Bankada FRETILIN ne’e repete, FRETILIN vota kontra OJE 2025 tanba ho rajaun orsamentu refere benifisiu barak liu ba ema koinesidu sira, maibé maioria povu barak iha Timor-leste
moris iha sofrimentu nia laran, nune’e FRETILIN avalia ba asaun konkretu sira ne’ebe akontese iha povu nia leet maka reprezenta povu iha PN vota kontra OJE 2025.
“Ita boot nia orsamentu mai repete nafatin saida mak tinan barak halo ona ba ita nian rain. Orsamentu ida ne’ebe sei hariku ema-oituan deit ne’ebe besik ho ita boot, povu barak kontinua rona deit katak osan ba sira maibe sira la senti. Tanba ne’e duni mak ami vota kontra ita boot nia orsamentu. Ho konsiensia ida katak dalan ne’ebe ita foti la los ba ita nia rain, ami vota kontra, ne’e hatudu frontalidade no honestidade, hodi dehan ba ita boot katak LAE! Quem avisa, amigo é, Parte husi prinsipiu katak la iha ema ida mak hetan monopólio da verdade e da razão”.
Governasaun ida, kontinuidade ho Governasaun seluk. Fallas no susesu ema hotu halo. Maibé aseita no rekoñese sala ne’e hahalok grandeza ida, tanba husi sala mak ema bele to’o buat los no diak. Importante mak iha korajen atu rekoñese katak ita halo sala no kurije.
Entretantu, deklarasaun ne’e Deputadu David Mandati Dias Ximenes hato’o ba Primeiru Ministru Kay Rala Xanana Gusmão, ho sentidu signifikativu balun katak, problema hotu ne’ebé Timor-Leste hasoru, maibe vale a pena, rekoñese erru no kurije agora, hodi loke dalan ba foinsa’e sira atu kontinua do que nunka hodi husik hela todan tomak ba jerasaun foun.
Jornalista : Guilhermino Ramos