Imajem : Dosente Moises Soares Magno noJoão dos Santos hala’o komunikadu imprensa iha Kampus Sentral UNTL,03/10/2024
SAPNewsTL, Dili – Universidade Nacional Timor Lorosa’e (UNTL) Faculdade Filosofia Ciéncia Humana (FFCH) nia dosente Moisés Soares Magno no João dos Santos informa katak iha tinan 2023 FFCH-UNTL gradua estudante finalista balun ne’ebe la tuir ezame monografia tanba hetan aseitasaun hosi Dekanu FFCH Martinho Borromeu iha tinan 2023.
Dosente Moisés Soares Magno informa katak iha tinan 2023 FFCH-UNTL gradua estudante finalista balun ne’ebe la tuir ezame monografia ka laiha monografia.
“Aat liu mak estudante balu gradua laiha monografia, aliás la hakerek monografia hodi ba ezame mós sira hosik ba gradua tiha ona. Estudante hirak ne’e mak estudante filozofia balu (laloos hothotu) ne’ebé gradua iha tinan akadémiku 2023. Evidensia mak bele aban ka bainrua ba haree sira-nia monografia iha Biblioteka Sentrál laiha”. Tenik Dosente Moisés Soares Magno ba jornalista sira iha Kampus Sentral UNTL, 03/10/2024
Estudante balun ne’ebe kritiku susar atu gradua no sofre pressaun oioin maibe estudante ne’ebe pasivu no la preokupa problema fakuldade fasil passa ezame no hetan graduasaun.
“Ezemplu balu mak hanesan estudante ne’ebé kritiku, ne’e sira halo susar atu gradua ka fó presaun ho dalan oioin to’o ohin dader estudante sira demo kontra Dekanu ho estrutura Fakuldade”.
“Enkuantu estudante balu ne’ebé mak pasivu ou lasensivel ka la preokupa ho problema ne’ebé Fakuldade halo, ne’e biar nia monografia hakerek rungu-ranga (sabraut) mós sira hosik pasa de’it atu bele gradua ho fasil”. Hateten Dosente Moises Magno
Nia fundamenta, kazu ne’e akontese tanba hetan aseitasaun hosi Nicolau Borromeu atual Vise-Dekanu Planu no Finansas ho nia ekipa iha FFCH-UNTL.
“Tanbasá laiha? Tanba estudante-sira ne’e lahakerek monografia, maibé ba kedas de’ it graduasaun. Sé mak halo ida-ne’e? Dekanu ho nia grupu. Nia grupu mak sé sé? Mak profesór Nicolau Borromeu atual Vise-Dekanu Planu no Finansas; profesora Marciana Almeida Soares atuál Diretora Departamentu Filozofia no profesora Elda Alves Sarmento atual Vise-Diretora Departamentu Filozofia. Iha tan dosente seluk, maibé sira ne’e tanba laiha ema ruma atu apoiu sira-nia hanoin entaun tuir loos de’it Dekanu ho nia grupu ida-ne’e nia desizaun hotu”.Nia sublinha
Dosente FFCH ne’e deklara katak dokumentu ne’ebé komprova iha avaliasaun ANAAA la representa realidade iha Fakuldade Filosofia barak inventa no manipuladu.
“Dokumentu neʼebé ami ensaiu ho ANAAA kona-ba atu halo akreditasaun programátika ne’e perfeitu loos, maibé iha realidade kontráriu tanba buat barak mak inventa de’it. Bele prova ida-ne’e mak liu husi haruka sira aprezenta dokumentu ne’ebe mak ami prepara atu halo reakreditasaun programátika ba estudante hothotu iha filozofia”.Nia deklara
Dosente Moisés Soares Magno konsidera Dekanu FFCH Martinho Borromeu halo korupsaun ka fori osan estadu nian ho maneiru falsifikasaun dokumentu ba relatóriu inklui guis de marsa.
“Ami na’in-2 hakarak hato’o ba públiku problema sériu boot rua iha Fakuldade Filozofia UNTL, 1. Dekanu na’uk osan estadu nian no 2. Dekanu hasai Dosente matenek no hakuak metin dosente beikten hanesan nia”.
Moisés Soares Magno informa kada tinan FFCH simu osan peskiza no estájiu ho montante hamutuk 45.000 hodi halo peskiza maibe la halo peskiza hodi falsifika dokumentu liu hosi asina guia de marça hodi halo korupsaun.
“Fakuldade Filozofia tinan-tinan hetan osan ba peskiza. Tuir dadus ne’ebé ami na’in-2 asesu iha tinan-2022 no tinan-2023 fakuldade filozofia simu osan dólares rihun 45 kada tinan ho nune’e tinan rua ne’e osan dólares rihun 90”.Nia fo sai
Dosente na’in rua ne’ebé halo denúnsia ba públiku ne’e afirma sira na’in rua prontu simu nia konsekuénsia bainhira ko’alia sai lialos ba públiku.
“Ami na’in-2 prontu simu konsekuensia saida de’it hosi ko’alia lialoos ida-ne’e. Tanba ami na’in-2 hanoin katak ho ko’alia lia loos ida-ne’e, bele salva osan povu nian no salva edukasaun iha Fakuldade Filozofia UNTL”.
“Saida mak metin iha ami na’in-2-nia neon hodi halo ami na’in-2 brani ko’alia sai ne’e mak osan no kargu ne’e labele sosa lia loos iha ami na’in-2. Lia loos tenke nafatın lia loos no lia loos tenke manán kargu no osan inklui buat aat hot-hotu”. Nia deklara.
Molok notísia ne’e publika, SAPNews tenta atu halo komfirmasaun ho Dekanu Fakuldade Filosofia Ciéncia no Humano Martinho Borromeu atu hatan ba denunsiasaun ne’ebe maibé seidauk konsege.
Enkuantu, Komisaun Anti Korupsaun (CAC) hala’o ona enkontru ho Magnifiku Reitor UNTL, Dekanu Fakuldade Filosofia no Estudante sira iha loron Sexta-Feira, 04 Fulan Outobru tinan 2024.
Jornalista : Marciana da Conceição