SAPNewsTL, Dili : Ohin madrugada maiz ou menuz tuku 03:00, Ema deskoñesidu tuda rahun vidru Gabinete Fronteira Maritima iha Palasiu Guvernu.
Xefe Seksaun Diresaun Nasionál Seguransa Patrimóniu Públiku (DNSPP), Palasiu Governu, António Soares Manuel informa sira nia parte simu informasaun hosi parte seguransa sira katak, kazu ne’e akontesimentu ne’e iha kuarta (13/12/23) oras 03:00 madrugada.
Nia hatutan, hafoin akontesimentu vidru ne’e rahun, ekipa seguransa sira hala’o kedas identifikasaun ne’ebé deskunfia ema deskoñesidu tuda hosi liur, maibé informasaun ne’e seidauk klaru loloos, tanba sira nia parte sei aprezenta relatóriu ba Komandante DNSPP hodi koopera ho Komandu PNTL liu hosi Seksaun Investigasaun Kriminál (SIK) no Servisu Informasaun Polisia (SIP) maka sei halo prosesu investigasaun klean.
“Akomentesimentu ne’e dehan ohin dader madrugada, maibé ami seidauk bele hatene klaru, tanba ami deskunfia ema tuda hosi liur maka tama mai kona vidru ne’e rahun kedas, maibé ami sei relata relatóriu ba komandante sira ho ita nia polisia sira atu mai halo investigasaun klean,” informa António ba jornalista iha Palasiu Governu, Dili.
Hafoin akontesimentu, Primeiru-Ministru, Kay Rala Xanana Gusmão hala’o kedas vizita hodi haree direita sala Seketaria Gabinete Fronteira Maritima nian ne’ebé ema tuda rahun no husu kedas ba parte seguransa sivil atu koordena ho PNTL loke prosesu investigasaun.
Edifisiu Gabinete Fronteira Maritima ne’ebé ema tuda rahun hosi parte kotuk besik malu ho Gabinete g7+ nian ne’ebé besik kedas área estrada nian.
Entretantu, Komandante Servisu Informasaun Polisia (SIP), Superintendente Asistente Polisia, Boavida Ribeiro no Servisu Nasionál Intelejensia (SNI) too kedas áreadores Gabinete Fronteira Maritima hodi halo identifikasaun ba kronologia akontesimentu.
Durante halo identifikasaun, SIP identifika fatuk ida ne’ebé ema deskoñesidu uza tuda rahun vidru monu hela iha sala laran, sai nu’udar evidensia ida ba parte PNTL liu-liu Seksaun Servisu Investigasaun Kriminal sei halo identifikasaun.
Jornalista : Marcela Mery da Costa