Imajem : Representante Santa Sé Iha Timor-Leste, Marco Sprizzi no Primeiru Ministru Kayrala Xanana Gusmão. Foto : Marciana da Conceição
SAPNewsTL, Dili – Wainhira Santu Padre Papa Francisco to’o iha Aeroportu Internasionál Comoro Dili, Eskoltu Papa Francisco dudu ses Primeiru Ministru Kayrala Xanana Gusmão.
Hafoin Seguransa Privadu (eskoltu) Papa Francisco nian dudu ses tiha Primeitu Ministru Kayrala Xanana Gusmão, mosu kedas desintendimentu entre eskoltu Primeiru Ministru nian hasoru eskoltu Papa Francisco nian.
Hafoin situasaun ne’e mosu, Primeiru Ministru Xanana Gusmão hateten “Ha’u la ba ida, ha’u la ba ida, Sira duni ha’u ne’e”. Hateten Primeiru Ministru Kayrala Xanana Gusmão iha Aeroportu Internasionál Nicolau Lobato Dili, 11/09/2024.
Iha tempu hanesan, Eskoltu Primeiru Ministru hirus no dudu eskoltu Papa Francisco nian hodi dehan “This Our Prime Minister”. Eskoltu Papa Francisco nian hili nonok no ses an hodi kontinua la’o.
Maske mosu dezintendimentu ne’e, maibé iha tempu hanesan Prezidente Repúblika José Ramos Horta ne’ebé iha fatin refere aproxima Primeiru Ministru Kayrala Xanana Gusmão hodi fo bensa no despede Santu Padre Papa Francisco iha Aeroportu Nicolau Lobato, Molok Santu Padre husik hela Timor-Leste.
Ligadu ho dezintendimentu ne’e, Representante Sante Sé iha Timor-Leste Marco Sprizzi rekunhese no husu deskulpa ba Primeiru Ministru Kayrala Xanana Gusmão tanba la hetan atensaun ikus mai mosu situasaun refere.
“Ami husu deskulpa ba Primeiru Ministru Kayrala Xanana Gusmão tanba falta hetan atensaun no konsiderasaun husi protoklu, Kayrala Xanana Gusmão nu’udar Maun Boot iha nasaun ida ne’e no fundador ba nasaun, ami husu deskulpa ba buat ne’ebé akontese ona”. Hateten Representante Sante Sé iha Timor-Leste Marco Sprizzi
Enkuantu, Sua Santidade Papa Francisco aranka ba Nasaun Singapura ho aviaun Aero Dili, oras ne’e to’o ona Singapura hodi hala’o vizita apostólika durante loron tolu (11-13/09/2024), hafoin sei fila fali ba Vatikanu.
Jornalista : Ermelinda Soares no Conzita Mota