SAPNewsTL, Dili: Atleta Divan Baptista no Ilda Engracia Maria dos Santos Raul sente orgullu sai manan dahuluk iha kampionatu nasional realiza husi Federasaun Tiru Timor-Leste (FETU-TL).
“Ha’u kontente sai manan nain dahuluk ba kampionatu nasional Federasaun Tiru Timor-Leste (FETU-TL) husi kategoria pistola, kampionatu ida ne’e mos dahuluk ba hau iha Timor-Leste, hau sei junior seidauk tama ba profesional”, dehan atleta Divan Baptista ba jornalista sira iha fatin kampionatu nasional Taibessi, Dili domingu (18/02/2024).
Divan hatutan, durante semana ida nia halo preparasaun ba kampionatu nasional ne’e, nia sente difisil tebes tanba pistola ho kilat boot nia recoil la hanesan, kilat boot ho liman rua maibe pistola uza liman ida deit, pistola pontu mira ne’e kiik oan susar atu tiru, depois bainhira tiru mak liman nakdedar la kona tarjetu.
Nia salienta tan, hein katak ba futuru kampionatu ne’e ema barak bele hatene hodi kria asosiasaun para atleta sira kompete barak liu tan.
Iha sorin seluk, atleta feto Ilda Engracia Maria dos Santos Raul hatete, nia sente orgullu sai manan nain ba kampionatu nasional FETU-TL ho kategoria kilat boot nian.
“Ha’u sente orgullu tebes tanba ha’u treinu modalidade tiru iha fulan barak nia laran ohin loron FETU-TL realiza kampionatu nasional hau tuir no hau sai manan nain dahuluk ba kategoria kilat boot nian”, tenik Ilda
Atleta feto ne’e afirma tan, nu’udar feto karik iha oportunidade husi modalidade tiru reprezenta Timor-Leste ba kompete kompetisaun iha estranjeiru ne’e hau prontu ba rai liur hodi hatudu ba mundu katak feto Timor-Leste bele.
Entretantu kampionatu nasional husi FETU-TL ne’e realiza durante loron rua iha loron 17-18 fulan fevereiru 2024 partisipa husi atleta feto nain rua no manan nain lima ba kategoria kilat boot ho pistola.
Atleta feto ba kategoria kilat boot manan nain dahuluk mak Ilda Engracia Maria dos Santos Raul simu premiu medalla, sertifikadu no orsamentu montante 200 USD, manan nain daruak mak Otilia hetan premiu medalla, sertifikadu no orsamentu montante 150 USD.
Atleta mane ba kategoria kilat boot manan dahuluk mak Zidanio simu premiu medalla, sertifikadu no orsamentu montante 200 USD, manan nain daruak Juvencio hetan premiu medalla, sertifikadu no orsamentu montante 150 USD, manan nain datoluk mak Alex simu premiu medalla, sertifikadu no orsamentu montante 100 USD.
Atleta mane ba kategoria pistola mak manan nain dahuluk Divan Baptista simu medalla, sertifikadu no orsamentu montante 200 USD, manan daruak hetan medalla, sertifikadu no orsamentu montante 150 USD.
Reportajen: Augusto dos Santos