Imajem : Deputada Bankada FRETILIN Nina Rangel Iha PN,18/11/2024. Foto : Media PN
SAPNewsTL, Dili : Relasiona ho kritériu ne’ebé Diretor Jeral Ministétiu Petróleu Rekursus Minerais (DJ-MPRM) katak molok hasoru diretor tenki hasai sasan, Deputadu FRETILIN Nina Rangel konsidera kritériu refere boot liu fali hasoru Amu Papa Francisco.
Tuir orientasaun husi Diresaun Jeral Ministétiu Petróleu Rekursus Minerais hakarak fo sai karta sirkular katak, molok atu tama ba iha diresaun geral hodi hasoru diretor geral atu ko’alia asuntu ruma ho diretor geral tenke la’o tuir regra ou kritéria ne’ebe mak diresaun geral fo sai hanesan tuir mai ne’e :
1. Hasai relogiu/jam tangan
2. Hasai telefone
3. Hasai gas/eskeru
4.hasai lapizeira
5. Hasai oklu
6. Hasai save motor no karreta
Ligadu ho regra mak sita iha leten, Deputada Bankada Frente Revolusionário Timor-Leste Independente (FRETILIN) Nina Rangel konsidera kritériu refere boot liu fali hasoru Amu Papa Francisco.
“Atu ba hasoru DJ ne’e hasai relógiu/jam tangan, hasai telefone, hasai gas/eskeru, hasai lapizeira, hasai oklu no hasai save motor no karreta, kritériu ida ne’e aat liu hanesan ita ba hasoru Amu Papa, ne’e instituisaun públiku”. Tenik Deputada Bankada FRETILIN Nina Rangel liu hosi Plenária Iha Parlamentu Nasional, Dili, 18/11/2024
Imajem : Despaixu DJ-MPRM, Dili, 15/11/2024.
Iha fatin hanesan, Deputada Lidia Norberta mós preokupa kona ba regra ne’ebé estabelese hosi Ministériu Petróleu no Rekursu Minerais tanba bele iha posibilidade funsionáriu no kazuais sira bele halo regra sira ne’e.
“Diretor Jeral ida halo regra ne’e oinsa, index liberdade imprensa tun hosi top 10 ba top 20 iha tinan 2023, ministru sira halo regra barak, agora diretor halo tan, hein tan funsionáriu no kazuais sira halo regra, asesor sira mos impõem”. Deputada Lidia Norberta kestiona
Deputadu Bankada KHUNTO kestiona ho diretor jeral ne’ebé halo rasik ninia regra hodi regulariza visitor hirak ne’ebé atu ba hasoru tanba nia parte konsidera ne’e refere rigorozu iha atendimentu públiku.
“Pior liután mak iha diretor balun ne’ebé kria lei rasik, komunidade sira atu ba hasoru mós tenki hasai relógiu, telemóvel no hasai buat hotu, ida ne’e maka ita kestiona, lei ne’e rigorozu uituan, presiza atendimentu públiku ne’e tenki ba ema hotu”. Hateten Deputadu KHUNTO Luis Roberto
Despaixu Diresaun Jeral Ministétiu Petróleu no Rekursu Minerais ne’e asina hosi João Jonastil Soares de Deus nu’udar asistente Diretor Jeral nian, regra refere hatun no vigora iha Dili, loron 15 Fulan Novembru tinan 2024.
Hafoin notisia ne’e fo sai, SAPNews seidauk halo komfirmasaun ho parte Diresaun Jeral Ministétiu Petróleu no Rekursu Minerais.
Jornalista : Ekipa Kobertura