Imajem : Dom Carlos Filipe Ximenes Belo
SAPNewsTL, Dili : Relasiona ho Igreza Katólika Independente ne’ebé eziste iha Timor-Leste hodi lori naran Dom Carlos Filipe Ximenes Belo, SDB. Dom Carlos deklara nia parte la rekunhese sira.
Tuir deklarasaun ne’ebé SAPNews asesu hosi Dom Carlos Filipe Ximenes Belo katak nia la hatene se mak sira no konsidera uza ninia arbiru deit tanba nia la hatene buat ida kona-ba asuntu ne’e.
“Ha’u Dom Carlos Filipe Ximenes Belo, SDB. Deklara katak ha’u la konhese sira ne’e no la hatene buat ida. Uza ha’u nia naran arbiru deit”.
Dom Carlos Filipe Ximenes Belo
“Ita hein Amu Bispu no Padre sira hatene serviço didiak ba Igreja Católica e hamutuk ho Amo Papa iha Roma. Ha’u la hatene buat ida, ha’u mos la konhese sira ne’e se? Uza ha’u nia naran arbiru deit. Ita reza ba malu nafatin”, Dom Carlos Filipe Ximenes Belo, SDB, 23 Novembro 2024. SAPNews Screenshot.
Entretantu, SAPNews tenta halo ona komfirmasaun ho parte grupu igreza katóliku independente ne’ebé halo publikasaun kona ba asuntu hirak ne’e maibé seidauk hetan resposta hosi sira.
Fo hanoin fali katak, antes ne’e grupu katóliku independente fo sai sira nia dadus katak sira rejista membru hamutuk rihun tolunulu resin neen ba leten (36 mil itál) no oras ne’e estabelese ona sira nia baze iha munisípiu sira.
Maske nune’e, maibé Igreza Katólika Timor-Leste liu hosi Conferénsia Episcopál Timorense (CET) seidauk halo deklarasaun ruma ligadu ho asuntu refere.
Jornalista : Ekipa Kobertura