SAPNewsTL, Lautem: Hafoin remata missa ba ezistensia Parokia Nossa Senhora Rainha dos Apóstolos – Luro ba dala neen, Bispu Dioseze Baucau, Dom Leandro Maria Alves husu ba joven sira atu hasees an husi hahalok violentu, konflitu no lori dame, hakmatek ba sosiedade.
Iha intervista ho Bispu Dioseze Baucau, haktuir haree ba joven sira ne’ebé inklina an iha arte marsiais(AM) no Arte Ritual (AR) ne’ebé sempre halo problema iha komunidade nia le’et no partisipasaun menus iha missa sira kada domingu
Dom Leandro Maria Alves hateten arte marsiais ne’e hanesan arte ida ne’ebé kria hodi lori no hakbesik ba komunidade oinsa atu komunidade mos bele seguru ho ezistensia arte marsiais
“Joven sira, ita hatene katak arte marsiais ne’e arte ida katak wainhira ita tuir ita nia vida mos tuir hanesan arte, buat ida ne’ebé bele habesik an ba ema i ema sente seguru iha ita, ne’ebé buka hasees husi ita hahalok ne’ebé mak halo ema la seguru”.
Bispo Dioseze Baucau, Dom Leandro Maria Alves saran lia hirak ne’e ba SAP News Timor-Leste hafoin remata missa selebrasaun aniversariu Parokia Luro bad ala neen iha salaun Parokia Luro, 22/08/2023
Bispu Dioseze Baucau ne’e fundamenta joven sira tenke evita halo problema no ezistensia joven sira ne’ebe iha atu dezenvolve nasaun no kreda ba futuru aban bainrua.
“Ita nia prezensa hanesan joven ne’e, prezensa ida ne’ebé mak aban bainrua dezenvolve ita nia suku sira, ita nia nasaun, ita nia kreda, ida ne’e mak ita hein teb-tebes husi ita nia joven sira”. Nia teni
Dom Leandro husu ba joven sira atu hadook an husi hahalok violentu sira hodi lori dame, hakmatek ba sosiedade hodi lori diak ba nasaun no kreda.
Husu ba joven sira atu evita no hasees an husi hahalok violentu sira no buka atu sai hanesan joven ne’ebé mak lori dame, joven ida ne’ebé mak lori hakmatek ba komunidade hahú kedas husi familia to’o Nasaun
Jornalista: Luis Pailofo