Imajem : Autor sira ne’ebe envolve iha Kazu Konfrontu Railaco, 21/05/2025. Foto : Média PNTL
SAP News TL, Bobonaro : Relasiona ho konfrontu ne’ebe akontese iha âmbitu selebrasaun 20 Maiu ba dala XXII, iha postu administrativu Cailaco hodi rezulta joven mane ida lakon vida, ohin ekipa konjunta asegura joven hirak ne’ebe envolve iha kazu refere.
Marciana Da Conceição – SAPNews
Tuir komunikadu ne’ebe SAPNewsTL asesu liu hosi página ofisial Facebook PNTL sita katak parte ekipa konjunta asegura ona joven hirak ne’ebe hola parte iha konfrontu ne’ebe akontese iha Cailaco.
“Komandu Unidade Espesial Polisia (UEP) destakadu iha Munisipiu Maliana liu husi Batallaun Maunetensaun Orden Pubulika (BMOP)- COP Delta no Postu F-FDTL Maliana halo operasaun konjunta asegura joven hirak ne’ebé entrega aan ba Eskuadra Polisia Cailaco tanba envolve iha konfrontu tuda malu iha loron 20 Fulan Maiu 2025”. Sita página PNTL, Bobonaro, 21/05/2025
Lembra fali katak, iha ámbitu loron 20 Maiu, komemorasaun independénsia Repúblika Demokrátika Timor-Leste (RDTL) ba dala XXIII ne’ebé hala’o iha Postu Administrativu Cailaco ne’e mosu konfrontu rezulta joven mane ida hetan tiru husi Polísia Nasionál Timor-Leste (PNTL), ikus mai Ronaldinho da Costa Ximenes lakon vida.
Tuir informasaun ne’ebé SAPNews asesu liu hosi fontes kredivel ida informa katak mosu duni desintendimentu iha postu Cailaco, Bobonaru. Hafoin tuda malu no duni malu entre parte rua, halo komunidade sira halai namkari tanba pániku.
Durante desintendimentu, parte PNTL ne’ebé presente iha fatin akontesimentu, halo kedas intervensaun ba kazu refere no tiru kanek joven mane ida no kanek iha hirus-matan rezulta ran sai makaas.
Hafoin akontesimentu, Ronaldinho da Costa Ximenes sofre kanek iha hirus-matan parte liman-los ne’e, hetan apoia no lori kedas ba sentru saúde Cailaco maibe kondisaun todan entaun transporta ona ba Munisípiu Bobonaru hodi halo tratamentu maibe minutu ikus la konsege salva nia vida tanba grave.
Maske mosu konflitu, maibe ho presenza no atuasaun PNTL Cailaco, situasaun la’o normal hikas, komunidade sira kontinua mantein hodi hein ba partisipa areiar bandeira RDTL iha Cailaco, munisípiu Bobonaru.
Matebian Ronaldinho da Costa Ximenes moris iha Suku Miligo, postu administrativu Cailaco iha loron 13 fulan Maiu tinan 2002 no hakotu iis iha loron 20 fulan Maiu 2025 ho idade ruanulu resin tolu (23) tanba hetan tiru hosi Membru PNTL iha hirus-matan.
Oras ne’e matebian Ronaldinho da Costa Ximenes nia isin-mate iha ona Mortuária Hospital Nacional Guido Valadares (HNGV) hodi halo prosesu autópsia tanba parte doutor iha Ospital Maliana ne’ebe halo operasaun orseik, ladauk hetan sasan ruma iha matebian nia isin loron.