Empresta Osan Halo Negósiu ! Martina :  Oho Mós, Ami Sei Fa’an Iha Lecidere

SAPNewsTL, Díli – Sekretariu Estadu Asuntu Toponomia no Organizasaun Urbanu (SEATOU) Germano Santa Brites hamutuk ho ekipa konjunta hasai negosiante sira ne’ebé fa’an iha jardim Largo Lesidere, negosiante Martina Alves sente emosionadu tanba osan ne’ebe sira uza hodi halo negósiu ne’e halo kréditu husi Kaeba’uk no Moris Rasik.

Negosiante Martina Alves hateten osan ne’ebe sira iha uza halo negósiu ne’e empresta husi Kaeba’uk no Moris Rasik, nune’e kada fulan sira ba selu osan funan.

“Sira mai derepente deit iha estrada hodi haruka ami tenke  husik fatin, bainhira la sai sasan sira hit ba soe iha Tibar. Entaun oinsa ho sasan sira ne’ebé ami sosa uza estadu nia osan hodi ba selu fila fali iha Kaeba’uk no Moris Rasik kada fulan”. Tenik negosiante Martina Alves ba SAPNews iha Largo Lesidere, 16/08/2024.

Martina Alves hatutan, sasan ne’ebe sira fa’an iha Largo Lesidere ne’e la folin iha merkadu Manleuana tanba movimentu komunidade no estudante sira la barak iha fatin ne’ebá.

“Ami nia sasan uituan hanesan ne’e labele ba fa’an iha Manleu, ami fa’an iha ne’e tane liman deit ba estudante tamba sira mak sosa, no laiha ema ida mak mai hodi fihir ami nia sasan, sira labele muda ami ba ne’eba. Ami la konkorda tanba ami nia osan atu sosa sasan hodi fa’an iha merkadu la sufisiente, sasan ne’ebé ami fa’an ne’e uituan deit hanesan agua, supermie, popmie no hahan”.Nia la konkorda

Inan feto ne’e dehan, la hatene atu ba fa’an fali iha ne’ebé ? iha tempu kampanha hakuak sira tanis maibe iha tempu ukun halo sira sai oin seluk, tan ne’e nia parte husu atu konsidera sira nia preokupasaun hodi fo fatin ba sira iha Jardim Largo Lesidere.

“Ami fa’an hodi sustenta nesesidade uma laran, apoia oan sira ba eskola, iha tempu kampanha, maske ami foer mós mai hakuak ami tanis, maibé to’o tempu ukun halo ema seluk sai di’ak, halo ami sai ema seluk fali, labele halo hanesan ne’e ba ami, bele mai oho tiha ami mós, ami sei nafatin iha ne’e”. Nia sublinha

Sekretariu Estadu Asuntu Toponomia no Organizasaun Urbanu (SEATOU) Germano Santa Brites Dias haktuir semana kotuk fo ona avizu ba vendedor no peskador sira, ohin ekipa mai hodi muda sira ba Manleuana.

“Ohin aktividde muda negosiante sira ne’e, aktividde normal iha ne’ebe tinan ida nia laran ona ekipa konjunta ne’ebe lidera husi SEATOU, daudaun ne’e halo hela servisu bá sidade Dilí, tanba ne’e semana kotuk ita mai fo avizu ona bá ita nia maluk vendedores no mós peskador sira atu prepara a’an”.

“Loron ida ohin ne’e ita muda sira, vendedores sira ita muda bá merkadu Manleuana no peskador sira ró Bero sira ne’e ita muda fali bá iha Bidau Santana, ró sira ita sei lori ba para iha ne’eba hotu”. Sekretariu Estadu Asuntu Toponomia no Organizasaun Urbanu (SEATOU) Germano Santa Brites sublinha

Governante ne’e husu ba ema hotu ne’ebe kategoria hela iha espasu públiku atu bele husik hela fatin liliu sira ne’ebe fa’an iha dala ninin, trotoar leten, jardim laran no okupa rai estadu nian, nune’e bele fo espasu ba governu ho halo dezenvolvimentu.

Enkuantu, negosiante hamutuk hitunulu resin-ida (71), entre sira negosiante 35 mak aseita muda sasan ba merkadu Manleuana, entretantu negosiansaun 36 mak la aseita no deside fila ba sira nia uman.

Jornalista : Marciana da Conceição