Imajem : Diretora EBC Luro Deolinda da Costa Hornay iha edifisiu EBC Luro, Sabadu – 12/10/2024. Foto : Leonel Alves
SAPNewsTL, Lautem: Estudante terseiru siklu 9 ano husi Ensino Basico Central Luro (EBC-L) hamutuk atus ida haat nulu resin hitu (147) sei preparadu hodi tuir ezame nasional.
Iha intrevista ho Diretora EBC Luro Deolinda da Costa Hornay hateten estudante sira ne’ebe preparadu atu hasoru ezame nasional ne’e hamutuk atus ida haat nulu resin hitu.
“Estudante 9 anu ne’ebe agora daudaun preparadu ne’e hamutuk atus ida haat nulu resin hitu (147) ne’ebe kompostu husi feto hamutuk hitunulu resin lima no mane hamutuk hitunulu resin rua, sira ne’e preparadu hasoru ezame semana oin”. Dehan Diretora Eskola EBC Luro Deolinda da Costa Hornay iha edifisiu EBC Luro, Sabadu – 12/10/2024
Diretora ne’e hatutan sira simu ona pontus ezame nasional hamutuk ho komisaun sira iha loron 11 Fulan Setembru.
“Preparasaun ezame nasional ba EBC Luro agora daudaun ami preparadu, pontus hotu-hotu ami prepara ona, horseik mak ami simu pontus ezame nasional hamutuk ho Amu Paroku, Administrador Postu Luro no komisaun Organizadora, Profesor hotu-hotu ami simu pontus lori to’o eskola”. Tenik Deolinda
Diretora Deolinda fundamenta estudante sira mos simu ona sira nia kartaun ezame, haree sira nia númeru ezame no sala de aula hodi prepara ba ezame nasional.
“Estudante sira agora daudaun simu ninia numeru no haree sala de aula, sala de aula hamutuk ualu ne’ebe kada aula nain hitu ne’ebe agora ami prepara ona”. Nia informa
Lider eskola EBC ne’e mos husu ba estudante sira ne’ebe atu hasoru ezame nasional ne’e hodi estuda makas no konsentrasaun maksimu atu bele hatudu rezultadu diak.
“Liu husi sira nia estuda no esforsu tomak ne’ebe durante tinan tolu nia laran mak sei determina liu hosi ezame nasionál, ha’u husu tenke estuda, fokus no seriu para hetan rezultadu ne’ebé diak, importante maka ita bo’ot sira tenke prepara an didiak para ikus mai hetan rezultadu di’ak maske ida-idak nia servisu maibe Maromak sei tulun buat hotu sei la’o ho di’ak”. Diretora Hameno
Entretantu, komisaun organizadora, verifikador sira no professor vizilante sira hamutuk tolunulu resin ualu ne’ebe mai husi filial no sentru Luro.
Enkuantu, eskola Ensinu Báziku Sentral Luro. total estudante husi 7 ano to’ o 9 ano hamutuk atus lima resin.
Jornalista: Leonel Alves & Sandra de Jesus