Imajem : Koordenador Fundasaun Nippon Hiroki Sugiyama iha Palasiu Presidensial Ai-tarak laran, Quinta (17/10/2024).
SAPNewsTL, Díli – Sentru Voluntáriu Fundasaun Nippon husi nasaun Japaun, realiza aktividade akampamentu asaun sosial hodi kria futuru ho labarik sira iha Timor-Leste
Tuir Koordenador Fundasaun Nippon Hiroki Sugiyama hateten, aktividade akampamentu ne’ebe mak realiza husi estudante voluntariu Japaun sira iha Timor-Leste foka liu ba asuntu edukasaun liu-liu liga ba dixiplina Matematika, Arte kultura no Desportu hodi hasa’e abilidade no kria futuru ho labarik sira iha Timor-Leste.
“Aktividade ohin loron nia mak estudante voluntáriu sira husi Japaun hanorin estudante sira hanesan disiplina matematika,arte no halimar Japaun nian”.Dehan Koordenador Fundasaun Nippon, Hiroki Sugiyama, ba Jornalista sira iha Palasiu Presidensial Ai-tarak laran, Quinta (17/10/2024).
Nia informa, aktividade aula ba labarik sira ne’e hala’o durante loron tolu (3) ona, no estudante voluntáriu sira ne’ebe mak fó aula ba labarik sira hamutuk nain sia (9), mai husi universidade Tokio, keio university, Nippon Sport Science University no Akita International University.
“Ami mai iha tersa, ami estudante universidade japaun nain sia (9) estuda iha japaun fakuldade desportu husi distritu ketak-ketak, maibe ami mai hamutuk iha Timor-Leste, atu fahe esperiensia ba labarik sira iha Timoroan sira, ko’alia kona ba materia tolu (3)”.
Imajem : Labarik sira ne’ebé tuir akompamentu iha Palasiu Presidensial Ai-tarak laran, Quinta (17/10/2024).
Nia fundamenta, Sentru voluntáriu fundasaun Nippon tuir planu sei realiza aktividade hanesan iha fulan novembru tinan ida ne’e iha kapital Dili no Metinaru hodi fahe esperiénsia ba labarik Timoroan sira ne’ebe aprende iha ensinu básiku no labarik sira ne’ebe la asesu ba edukasaun.
“Tuir planu iha fulan novembru bainhira ami mai fila-fali sei realiza aktividade fo aula ba labarik sira iha Dili no Metinaru, tanba ami sente katak Timor Oan sira fasil tebes aprende buat foun” Nia haktuir”
Entretantu estudante voluntariu sira ne’ebe mai husi nasaun Japaun kompostu husi feto nain hat (4) no mane nain lima (5), ne’ebe fasilita treinamentu kona disiplina tolu (3) ba labarik Timoroan sira hamutuk 121
Jornalista: Marcela Mery da Costa