Imajem : Entrevista Inan Faluk Alcina Ximenes iha Suku Lore 1, Lore-Lautém, 31/05/2024. Foto : Ekipa Media Tour
SAPNewsTL, Lautém – Média Tour ne’ebe AJTL organiza no kolabora ho Oxfam Timor-Leste Iha Lautém, Inan Faluk Alcina Ximenes konsidera moris ne’e todan wainhira laiha parseiru moris ne’ebe sempre apoia familia iha tempu difisil no fasil nia laran.
Iha entrevista ho inan faluk Alcina Ximenes hateten, nu’udar inan faluk ida sente iha responsabilidade hodi halo esforsu hotu ne’ebe bele hodi sustenta oan sira nia eskola liu husi hili nu maran no fa’an nu.
“Ha’u nu’udar feto faluk ida sente iha responsabilidade hodi halo buat ne’ebe bele liu husi hili nuu maran ba faan, nune’e bele selu oan sira nia eskola no atende ba nesesidade uma laran”. Hateten Inan Faluk Alcina Ximenes ba jornalista sira iha Lore 1, Lore-Lautém, 31/05/2024
Inan faluk ne’e haktuir nia parte sente todan tebes, wainhira laiha ona parseiru moris tanba obrigadu nunudar feto tenki sakrifika an hodi buka osan sustenta nesesidade uma laran nian.
“Ha’u sente todan wainhira laiha ona laen, maibe haree ba nesesidade lor-loron nian ho oan sira, maske laiha ona parseiru tamba maromak nia planu oin seluk, maibe ha’u nudar feto faluk ida sai inan no aman hodi buka osan atu bele sustenta ha’u nia oan sira nia eskola no ba nesesidade lor-loron nian”. Nia dehan
Maske todan nune’e, maibe Alcina Ximenes afirma nia parte simu realidade ne’ebe mosu tanba laiha moris ida diak, diak to’o rohan la’ek no aat, aat to’o rohan laek, buat hotu mosu mai tuir tempu ida-idak nian.
“Maske ha’u sente moris mesak todan ba ha’u nia moris lor-loron nian maibe ha’u tenki simu ho realidade moris ne’e tanba ita ema moris iha mundu sempre diak no aat ne’ebe akontese ba ita nia vida, nune’e ha’u tenki buka meius oinsa mak faan nu’u, hakiak manu,halo to’os no kuda modo hodi bele hetan osan ba sustenta moris familia nian”. Hateten Alcina
Imajem : Nú ne’ebe inan faluk Alcina Ximenes habai no fa’an hodi sustenta nesesidade familiar iha Lore-Lautém
Alcina Ximenes akresenta, moris ne’ebe depende ba to’os no produtu lokal sira sempre hein udan iha tempu bailoron, maibe sempre iha dalan barak hodi halo, nune’e bele responde ba nesesidade uma laran nian.
“Ami nia moris depende ba to’os hanesan nu maran, kuda modo iha to’os. Produtu lokal ne’e fan de’it iha Lore, atu lori ba merkadu Lospalos ne’e wainhira produtu barak”. Nia informa
Iha sorin seluk, Inan feton Linda Ximenes haktuir ho kondisaun nia katuas oan ne’ebe sofre moras defisiente matan, iha ne’ebe halo nia esforsu mesak hodi sustenta nesesidade uma laran, halo nia sente triste tanba la hetan rendimentu naton hodi sosa foos ne’ebe nia folin kontinua aumenta iha rural.
“Ha’u hanoin ba situasaun sira hanesan ne’e, tur hanoin barak, hanoin ba nia katuas oan ho pasiensia, atu halo saida maka sustenta familia uma laran tenki esforsu hanesan responbilidade ba feto no mane nia serbisu hotu tanba ho kondisaun laen nian”.
“Foos deit iha ne’e faan ho presu 20,00 dolar kada saku 25 kilograma, atu sosa ida ne’e depende osan ne’ebe ha’u hetan liu husi fan nuu, bainhira iha osan ami sosa, dala barak osan laiha no la to’o entaun ami pasiénsia hodi la sosa no kesi kabun hodi han deit hahan to’os nian ne’ebe iha”. Tenik Linda Ximenes
Linda Ximenes konta, wainhira nia laen seidauk sofre moras, nesesidade uma laran kontinua la’o diak maibe hafoin sofre moras ne’ebe matan la haree, kondisaun moris hetok difisil liu tan tanba nia mesak kaer servisu mane nian hodi sustenta familia sira.
“To’os ne’ebe halo iha hektar ida, uluk ha’u nia laen matan sei diak la’o halo serbisu ajuda ha’u ne’e produsaun aihan sufisiente ba ami, maibe bainhira ho kondisaun matan la haree ona hanesan aihan mos komesa menus tanba ha’u mesak mak ba halo to’os”. Nia konta
Inan feton ne’e informa, produtu barak ne’ebe kuda iha to’os laran hanesan batar, talas no aifarina, maibe sente triste tebes tanba to’os ne’ebe ho kondisaun laiha lutu ikus mai animal ba estraga hotu.
“Ha’u halo to’os mesak tanba hare ba ha’u nia laen nia kondisaun ne’ebe moras ho difisiensia matan la hare, serbisu ida ne’ebe todan ba ha’u maka halo lutu ba to’os ne’ebe ha’u halo, lutu ha’u halo maibe ha’u nia forsa la to’o ha’u labele asesu ba produtu ne’ebe iha to’os laran tanba animal sira estraga hotu”.
“To’os ne’ebe ha’u halo maka kuda ai han tradisional hanesan batar, talas no aifarina maibe lutu ne’ebe ha’u halo ladun diak tanba ha’u mos laiha forsa halo diak entaun animal hanesan karau sira maka ba estraga hotu, realidade ida ne’e mak halo ha’u triste”. Nia dehan
Enkuantu, tuir dadus uma kain iha Suku Lore 1 Postu Administrativu Lore hamutuk 841 ho total populasaun 3.739 kompostu husi mane hamutuk 1848 no feto Hamutuk 1891.
Programa media tour iha Munisipiu Lautém ne’e organiza husi Assosiasaun Jornalista Timor-Leste (AJTL) no kolabora Oxfam Timor-Leste liu husi apoiu fundu hosi Oxfam iha Hongkong
Jornalista : Ermelinda Soares