Imajem : Proseisaun Akompanha Saudozu Ernesto Fernandes Dudu nia Isin-Mate hosi Igreja ba fatin funeral iha Ermera, 10/05/2025
SAPNewsTL, Ermera : Durante halot Saudozu Ernesto Fernandes Dudu ba nia deskansa fatin ikus, Adão Fernandes husu ba estadu no governu hodi hatur estátua Ernesto Dudu, tau nia oan ba membru F-FDTL no prosesa lais ninia pensaun.
Oan mane husi Saudozu Ernesto Fernandes Dudu, Adão Fernandes husu ba estadu no governu hodi hatur estátua Ernesto Dudu, tau nia oan ba membru F-FDTL no prosesa lais ninia pensaun.
“Hakoi Saudozu iha ne’e, hafoin tinan lima mak bele ba tau iha fatin ne’ebe identifika ona, ami husu rekunhese saudozu nia oan na’in rua ka tolu sai membru F-FDTL hodi asegura ami nia aman nia kargu ne’e”.Hateten Adão Fernandes liu hosi nia diskursu iha Ermera, 10/05/2025
Adão Fernandes mos hato’o nia lamentasaun ba governu dasia tanba familia Fernandes teste vaga servisu iha Ermera nunka manan.
“Ami lamenta ba governu ida ne’e, ami família Dudu la hetan servisu, ami teste vaga ruma la liu maske ami halo liu hela ema balun iha ne’e, ema seluk nia aman iha, nia oan teste vaga liu maibe ami la hetan”.Adão Fernandes kestiona
Oan mane ne’e konta, “Ami nia aman hanorin ami labele husu ba estadu maibe buka rasik hodi hetan, ami husu deit mak tau ami-nia aman nia estátua iha rotunda dalan ba Likisa ne’e, nune’e ami bele sente katak maske ami-nia aman lahatene lee no hakerek maibe nia mós aswain ida iha rai Timor”.
“Husu ba CCLN hodi halais prosesu pensaun ba ami-nia aman nian atu bele halo transferênsia, labele halo to’os tanba ida ne’ebe hatene lalais liu, ida ne’ebe la hatene kleur liu, la’o ba oin araska liu”.
Oan mane fo agradese ba instutuisaun no ema hotu ne’ebe disponivel no partisipa iha serimonia funeral Saudozu Ernesto Fernandes Dudu iha munisipiu Ermera.
“Ami hakarak fo agradese ba ema hotu ne’ebe mai Ermera, karik buat balun la’o ladiak karik ami husu deskulpa”. Sublinha Adão Fernandes liu hosi diskursu iha Gleno.
Padre Juvito do Rego fo agradese ba Governante sira no entidade hotu ne’ebe bele partisipa hodi presta omenajem ikus no halo misa ba Saudozu Ernesto Fernandes Dudu.
“Obrigadu ba Partidu Demokratiku (PD) ne’ebé fo konfiansa ida ba nia sai Deputadu ida no dignfika nia iha Parlamentu Nasionál, Saudozu Ernesto Dudu hanesan orgullu ida ba povu Ermera, mai ita hahi heroi sira wainhira sei moris la’os deit mate ona mak foin hahi, ita tenki hahi heroi sira hotu ne’ebe lutaba rai ne’e”.
“Obrigadu barak ba ukun na’in sira no ita boot sira hotu ne’ebe mai Ermera hodi partisipa misa funeral ba Saudozu Ernesto Fernandes Dudu iha Ermera, agradese wain tebes ba imi”.Hateten Padre Juvito do Rego liu hosi omilia iha Igreja Gleno Ermera,10/05/2025
Komandante Rejiaun IV no Eis Deputadu Ernesto Fernandes “Dudu” fila hikas ona ba Aman Maromak nia kadunan santu, wainhira hala’o tratamentu iha Hospital Nacional Guido Valadares (HNGV) tanba sofre moras.
Antes ne’e, Saudozu Ernesto Dudu hetan atakasaun derepente, nune’e família lori ba halo tratamentu iha Hospital Nasional Guido Valadares maibe la konsege salva tanba sofre moras ne’ebe grave.
Durante Saudozu Dudu baixa iha ospital, hetan vizita hosi Primeiru Ministru Kay Rala Xanana Gusmão, Jeneral Reformadu Lere Anan Timur, Vise Primeiru Ministru Mariano Assanami Sabino no Membru Governu dasia sira iha fulan Abril liu ba.
Saudozu Ernesto Dudu nia mate isin hala’o ona vizita ikus ba Kuartel Jeral F-FDTL, Sede Nasional PD Kolmera, no CCLN hodi presta omenajem ikus.
Saudozu Ernesto Fernandes Dudu hakoi iha nia rezidénsia, Gleno, Munisipiu Ermera, 10 Maiu 2025.
Serimónia Fúnebre ne’e hetan partisipasaun hosi governante sira, eis titular orgaun soberanu sira, veteranu, autoridade munisípiu no populasaun Ermera.
Jornalista : Ermelinda Soares & Daniel Da Silva