Imajem Sidadaun Jose Bernardo de Jesus Soares Mate Iha Sela, Kaikoli, Dili, 01 Setembru 2022
SAPNewsTL, Dili: Familia Matebian Jose Bernardo de Jesus Soares ezije Polisia Nasional Timor-Leste (PNTL) hamutuk ho Ministériu Saúde (MS) fo sai ona rezultadu autopsia ba familia tanba autopsia halo hotu ona.
“Matebian Jose Bernardo de Jesus Soares mate ho kondisaun la justu ne’ebe investigasaun ba kazu ne’e mos daudaun la’o hela maibe to’o agora atu tama fulan lima ona maibe la iha rezultadu tan ne’e ami parte familia hamutuk juventude la tau fiar ona ba PNTL kona ba investigasaun kazu ne’e, tan ne’e ami ezije PNTL ho ministériu saúde atu fo sai rezultadu orijinal otopsia iha fulan haat liu ba familia”, Portavoz familia matebian Moreno Liberto Oliveira da Costa ba jornalista sira liu husi konferensia imprensa iha hotel Luz Clarita Bairro Formosa, Dili tersa 24/01/2023
Moreno hatutan, sira hakarak husu ba mediku ne’ebe halo autopsia ba familia matebian, kazu ne’e halo povu rai klaran la hakmatek liuliu joven sira tanba PNTL laos atu tulun povu maibe sai fali inimigu ba juventude Timoroan hotu
Familia Matebian Jose Bernardo de Jesus Soares hala’o Konferensia imprensa iha hotel Luz Clarita Bairro Formosa, Dili tersa 24/01/2023
Nia afirma, bainhira matebian Jose Bernardo de Jesus Soares mate iha sela PNTL laran, polisia sira la fo hatene direitamente ba familia maibe bolu fali ambulansia mak uluk, ida ne’e orgaun komponente seidauk informa mai familia, tanba saida mak polisia kaptura ba sela laran maibe ikus mai nia hakotu is iha sela laran, sela sai fatin seguru ba ema laos sai fali fatin ba ema mate
Portavoz afirma, kazu matebian Jose Bernardo de Jesus Soares nian sai hanesan kazu dahuluk iha Timor-Leste tanba mate iha sela laran PNTL nian tan ne’e husu ba orgaun soberanu hodi aselera kazu para hetan lais nia naroman tanba kazu ne’e halo familia lakon fiar ba PNTL bainhira tan mak joven barak mate iha polisia nia liman hodi loke orgaun soberanu nia matan hodi hapara PNTL sira nia attitude ne’ebe sai fali inimigu ba joven sira.
Reportajen: Augusto dos Santos & Antonio Altamiraldo