Imajem : Saudozu António Soares da Silva Maucalo
SAPNewsTL, Dili : Eis Xefe Casa Militár Prezidente Repúblika, Antonio Soares da Silva ‘Maucalo’ hakotu iis tanba sofre moras prostat wainhira hala’o hela tramentu iha Ospitál Internasionál Malásia.
Tuir Oan Mane Boot husi Saudozu nia Maun, Pascoal Soares Pinto Sidik Lemorai informa Saudozu sofre moras prostat iha fulan Agustu, nune’e familia lori ba halo tratamentu iha Ospitál Malásia durante fulan rua (Jullu-Agustu) hodi halo operasaun hafoin fila mai Timor.
Iha loron 29 Fulan Setembru, Família lori tan mai ospitál Malásia hodi halo tratamentu maibe hetok grave liután tanba nia isin bunu, liu tiha semana ida resin, António Soares da Silva hakotu iis iha ohin dader.
“Saudozu António Soares da Silva hetan moras prostat, mai halo tratamentu durante fulan rua (Jullu-Agustu 2024), iha loron 29 Setembru mak grave uituan ne’ebe ospitál fo aimoruk diak oituan, liu loron tolu komesa kabun bubu mak halo nia isin lolon sira bubu hotu hodi hakotu Iis iha Malásia”. Tenik Pascoal Soares Pinto Sidik Lemorai iha Malásia, 12/10/2024.
Representante família ne’e fo sasin Saudozu Maucalo hanesan mestre ida ne’ebé brani no firme iha desizaun sira hodi eduka no serví povu iha tempu ne’ebé nia sei moris, Pascoal sente triste tanba lakon tebes aman diak ida ne’ebé sempre fo konsellu ba oan sira maibe tanba Maromak nia planu laiha ema ida bele satan desizaun ne’e.
“Ha’u nia apa kiik ne’e ema ne’ebe si’ak, nia hanesan mestri ba oan sira liliu ami familia tomak, nia sempre obriga ami atu kumpri oras servisu, hanorin ami atu sai servidor ne’ebé dixiplina ba tempu no desizaun sira, nia sempre ko’alia ho lia makaas maibe hadomi tebes ami, ha’u sempre konsulta buat barak ba nia nu’udar mestre ida, maibe Maromak nia planu oin seluk, ohin nia laiha ona, ami sente triste no lakon tebes iha situasaun kruel ida ne’e”.Hateten Pascoal Lemorai
Ligadu ba transladasaun mate isin, Pascoal informa ojin sira sei trata dokumentu, tuir planu sei aranka husi Malásia iha loron segunda feira, semana oin.
“Ami sei trata dokumentus, se la aranka segunda-feira, sai husi Malásia toba kalan ida iha Bali foin mak aranka ba Dili, mate isin sei to’o iha Dili, entre loron Ters-Feira ka Kuarta-Feira”. Nia informa
Hafoin to’o Dili, Família sei lori ba rai moris fatin, Uatulari, Munisípiu Viqueque hodi halo serimónia kultural, molok lori fila ba halot iha Jardim dos Herois Metinaru Dili.
“Planu, ami sei lori ba Uatulari-Viqueque, hafoin lori fila ba halot iha Jardim dos Herois Metinaru”. Hateten Pascoal
Imajem : Saudozu António Soares da Silva “Maucalo” iha tempu resisténsia.
Fo hanoin fali kagak, Saudozu Koronel António Soares da Silva alias “Maucalo” moris iha Macadiqui, Postu Administrativu Uatulari, Munisipiu Viqueque, loron 09 fulan Dezembru 1962, tinan sanulu resin neen (16) nia partisipa iha luta libertasaun nasionál, iha ne’ebé hola parte iha Postu Desmobilizasaun Komandante de Unidade.
Saudozu Koronel António Soares da Silva simu kondekorasaun ho Medalha Ordem de Guirrilha iha loron 19 fulan Maiu 2007 no hetan fitun tolu bazeia ba ninia partisipasaun, dedikasaun no sakrifisiu naruk ne’ebé nia fo ba Timor-Leste nia luta ba ukun rasik an.
Molok tama iha periodu invasaun Saudozu tama Forsa Armada Libertasaun Nasionál Timor-Leste (FALINTIL) nu’udar Soldado iha sentru instrusaun Taibessi Dili. Hafoin invazaun Maucalo kontinua sai militar ho kargu soldado partensia ba kompanhia movel ho Komando Paulino da Gama Mauk Moruk iha Setor Ponta Leste.
Iha tinan 1976 Maucalo asumi kargu Komandante Pelutaun Movel ne’ebe ikus mai transforma ba forsa intervensaun.
Iha 1977-1978, Maucalo noemadu Komandante pelutaun primeira kompanhia de Choque . Hafoin zona libertadas rahun, husi 1979-1980 Maucalo kontinua Komandante pelotaun forsa konsentrada.
Liu tiha Konferensia reorganizasaun Nasional iha 1981 Maucalo ezerse kargu Komandante pelotaun da kuatru kompanha husi Brigada Vermelha kolokadu iha Regiaun Nakroma.
Iha tinan 1984-1991 Maucalo asumi kargu segundu Komandante ba III Unidade ba forsa konsentrada.
Bataliuan 303 husi forsa invazaun Indonesia kaptura Maucalo iha dia-20 junhu 1991 no sai prizoneiru iha Soibada , Ainaro 1996.
Iha prizaun Maucalo involve iha atividade organizasaun frente Klandestina to’o 1999, ikus mai reingresu ba forsa Armada FALINTIL.
Iha periodu ukun rasik an, Saudozu Maucalo asumi kargu nu’udar Chefe da Repartisaun da Justiça das-F-FDTL hodi servi instituisaun sagradu ne’ebé ho domin, konsisténsia, responsabilidade no honestidade.
Iha tinan 2017, Saudozu António Soares da Silva “Maucalo” eskollidu sai Xefe Casa Militar, Prezidente Repúblika Demokrátika Timor-Leste (RDTL) Francisco Gusterres Lu Olo iha tinan 2017 to’o 2022.
Saudozu António Soares hakotu iis ka remata ninia peregrinasaun iha mundu ho idade neenulu resin-rua (62), iha loron 12 fulan Outubru tinan 2024, wainhira hala’o tratamentu iha ospitál Malásia tanba sofre moras prostat.
Deskansa ho hakmatek, Saudozu António Soares Maucalo, Ba hamutuk ho Maromak, la’o ho Maromak no hela ho Maromak iha nia kadunan santu.
Obrigadu barak ba dedikasaun no abnegasaun tomak ba Timor-Leste. Adeus no adeus. Até um dia.
Jornalista : Marciana Conceição