Imajem : Diretor Jeral Arte Kultura, Jil Paulino dos Santos Oliveira hala’o komunikadu imprensa iha palásiu prezidensial aitarak-laran, 31/07/2024.
SAPNewsTL, Dili – Atu hametin prinsipiu valores kultural iha Timor- Leste, Presidência Republika (PR) no IX Governu Konstitusional sei realiza Festival Rabilau
Tuir Diretor Jeral Arte Kultura, Jil Paulino dos Santos Oliveira haktuir Prezidente Repúblika hamutuk ho IX Governu Konstitusional liu husi linas ministeriais sei realiza festival nasional ho naran festival nasional Arte no Kultura RABILAU.
“Festival Nasional Arte no Kultura RABILAU 2024 mai ho objetivu hodi hametin no haburas prinsípiu valores kultural, kria sosiedade ida ne’ebe mak mai ho ninia identidade rasik. Iha sorin seluk mos sei fo marjen prinsipal ba estabilidade no paz, kria relasaun diak entre parte ezekutivu sira, hodi explora nafatin fatin turístiku no kria interkámbiu entre Nasaun sira ho Timor-Leste iha kontestu Unidade Nasional no Fraternidade Umana,” dehan Diretor Jeral Arte Kultura, Jil Paulino dos Santos Oliveira liu husi komunikadu imprensa iha palásiu prezidensial aitarak-laran, 31/07/2024
Diretor Jeral Sekretaria Estadu ba Arte no Kultura (SEAK) ne’e informa eventu Festival Rabilau sei kompostu hosi kompetisaun dansa folklóriku, pitura, múzika koremetan, Kompetisaun Arte Digital, aprezentasaun dansa tradisional no ritus kulturais.
“Planu no polítika prioritaria-sira bazeia ba kontextu protesaun, prezervasaun, valorizasaun, promosaun, jestaun no salvaguarda ba patrimoniu kultural material ka imaterial, movel ka ímovel sei toma responsabilidade masimu ba atividade sira mak hanesan Kompetisaun ba Dansa Folklorika, Pintura, muzika Kore-Metan, Kompetisaun Arte Digital, aprezentasaun dansa tradisional no ritus kulturais.” Diretor sublinha
Atividade kompetisaun ba dansa Folklorika, Múzika Kore-Metan sei envolve husi dansarinas tradisionais husi treze munisipius inklui RAEOA.
Atividade kompetisaun ba Pinturas (Live Painting) no Arte Digital sei loke ba Artista Timoroan sira husi munisipiu too Nasional.
Atividade aprezentasaun no manifestasaun Artistika husi Dansa Tradisionais no Rituas Kulturais sei aprezenta husi dansarina tradisional no Lia-Nain sira husi treze munisipius inklui RAEOA.
Kompetisaun Arte Dijital (Logo no Poster) Atividade kompetisaun ne’e importante tebes hodi produz dezenador (Designer) ne’ebe ho konesimentu integradu no iha sensibilidade klean kona-ba aspetu Teknolozia Timor Leste nian hodi halo promosaun ba expresaun sira iha manifestasaun oin-oin ne’ebe variavel tebes iha Timor-Leste.
“Kompetisaun Logo no Poster ne’e realiza atu loke espasu ba foinsa’e Timoroan sira hodi promove sira nia abilidade no talentu ne’ebe iha, enkoraja no estimula foinsa’e sira ne’ebe sai ona vensedor iha eventu sira ne’ebe liu ona, atu hasa’e liu tan kualidade performansia no kreatividade artístika ne’ebe iha hodi bele kompete tan iha nível Nasional no Global”. Nia fundamenta
Programa kompetisaun ba Logo no Poster sei nakloke ba públiku, nune’e ohin loron 31 fulan Julhu tinan 2024, Sekretaria Estadu ba Arte no Kultura lansa ofisialmente Kompetisaun Arte Dijital liu husi manifestasaun artístika Logo no Poster ba Artista Timoroan sira nu’udar atividade prinsipal ida ba Festival RABILAU 2024.
Orsamentu ba eventu ne’e mai husi Prezidensia Republika, entretantu parte Governu fo apoiu no asidténsia tékniku husi inisiu to’o remata.
Eventu Festival ne’e sei realiza iha fulan setembru tinan 2024, daudaun ne’e parte komisaun organizadora kontinu hala’o preparasaun ba eventu refere.
Jornalista: João Marito