Imajem : Primeiru Ministru Interinu, Atual Presidente Komisaun Festivál Rabilau iha Ainaru. Foto : Media VPM
SAPNewsTL, Dili : Prezidénsia Repúblika José Ramos Horta hala’o kolaborasaun ho IX Governu Konstitusionál hodi realiza Festivál Rabilau tinan 2024 iha Maubisse Munisípiu Ainaru.
Festivál Rabilau hanesan baze importante ida ba Programa Nasionál Promosaun Turizmu Timor-Leste nian, iha ne’ebé ho objetivu atu hametin indústria nasionál sira iha arte no kultura, nune’e mós promove rikusoin eransa kulturál, tradisionál, no beleza naturál nasaun nian ba mundu.
Prezidente Repúblika José Ramos Horta sente orgullu sai uma-na’in ba Festivál Rabilau 2024, selebrasaun vibrante ida ba eransa kulturál, tradisaun, no beleza natural Timor-Leste nian.
“Festivál ne’e hala’o iha foho Rabilau, iha Postu Administrativu Maubisse, hahú hosi loron 16 fulan-Outubru to’o loron 19 fulan-Outubru tinan 2024”. Haktuir Prezidente Repúblika José Ramos Horta liu hosi Komunikadu Imprensa, Dili,12/10/2024.
Eventu ida ne’e nu’udar rezultadu husi esforsu kolaborativu entre Prezidénsia Repúblika no IX Governu Konstitusionál. Forma ona komisaun konjunta ida, ho Prezidente Ramos-Horta nu’udar patronu no Segundu Vise Primeiru Ministru, Mariano Assanami Sabino, lidera inisiativa ne’e..
Festivál Rabilau tinan 2024 rejista programa oioin maka hanesan, “1. Aprezentasaun kulturál ne’ebé hatudu múzika, dansa, no instrumentu tradisionál Timor nian, 2. Kompetisaun arte iha pintura, múzika koremetan, no arte dijitál, 3. Kompetisaun gastronomia no feira ne’ebé hatudu hahán lokál.”
“4. Feira livru nian no bazar produtu lokál nian, 5. Aprezentasaun múzika moderna husi artista timoroan sira, 6. Atividade ba labarik sira no sinema, 7. Eventu desportu lokál sira no 8. Esplorasaun guiada ba foho Rabilau”.
Laureadu Nobel ba Pás, José Ramos-Horta, afirma, “Festival Rabilau ne’e la’ós de’it eventu turizmu ida, ne’e hanesan selebrasaun ida ba ita-nia rikusoin kulturál no konvite ida ba mundu atu deskobre Timor-Leste nia furak. Ami haksolok atu simu vizitante sira hodi esperiénsia ami nia kultura úniku no ami-nia povu nia laran-kmanek.”
Eventu loron haat ne’e promete atu sai nu’udar espozisaun kaptivante ba identidade Timor-Leste nian no konvite ida ba mundu atu deskobre beleza naturál nasaun nian.
Vizitante sira ba Festivál Rabilau sei iha oportunidade atu mergulha sira-nia an iha kultura timoroan nian liuhosi workshop kona-ba artezanatu tradisionál sira, vizita ho matadalan ba fatin istóriku sira, no atividade eko-turizmu nian ne’ebé hatudu paizajen furak Timor-Leste nian.
Enkuantu, Festivál Rabilau sei hahú iha loron 15-19 fulan Outubru tinan 2024, oras ne’e ekipa hosi Xefe Estadu no parte governu iha ona Rabilau, Postu Administrativu Maibisse Munispiu Ainaru hodi prepara ba festivál ne’e.
Jornalista : Marciana da Conceição