Imajem : Jornalista Na’in 14 simu Karteira Profissional hosi Konsellu Imprensa iha Dili, 06/05/2025
SAPNewsTL, Dili : Konsellu Imprensa Timor-Leste (KI-TL) atribuí Karteira Profissional ba jornalista hamutuk 14, entre sira inklui feto na’in 4 husi média online SAPNews.
Iha diskursu Presidente KI Otelio Ote parabeniza jornalista 14 ne’ebe simu ona karteira profissional husi média GMN-TV, SAPNews, LABEH, Independente no Hatutan.
“Parabéns ba imi hotu, ohin imi simu ona karteira profissional, parabéns mós ba média na’in sira tanba husi média mak iha jornalista sira, esforsu hodi kumpri kode étika jornalismu 10”.Teni Presidente KI Otelio Ote liu hosi nia diskursu iha Salaun KI Kintal-Boot, 06/05/2025.
Imajem : Xefe Redasaun SAPNews Ermelinda Soares
Xefe Redasaun SAPNews Ermelinda Soares ne’ebe hola parte mós iha atribuisaun karteira profissional ne’e fo agradese ba konsellu imprensa tanba bele fo espasu no oportunidade hodi forma jornalista sai forte iha kunhesimentu, brani iha kobertura no firme iha vokasaun nu’udar jornalista profissional.
“Ha’u nia parte sente gratidão tebes tanba bele simu ona karteira profissional, agradese ba konsellu imprensa tanba forma ona ami sai forte, brani no profissional iha vokasaun jornalista nian”.
“SAPNews nia jornalista feto na’in 4 mak simu karteira profissional, ne’e atu hatudu katak ami feto sira bele no prontu hodi foti responsabilidade liu hosi kobertura, asegura independênsia editorial, polítika redasaun no kaer metin prinsipiu jornalismu hodi garante sustentabilidade média ne’ebe ami rasik hari’i, hametin no haboot”. Hateten Ermelinda Soares, atual Xefe Redasaun SAPNews.
Jornalista feto na’in haat hosi SAPNews ne’ebe simu karteira profissional hosi Konsellu Imprensa mak hanesan Ermelinda Soares atual Xefe Redasaun, Marcela Mery da Costa, Anina Gama Martins no Conzita da Silva Mota Santos.
Partisipa iha atribuisaun karteira profissional ne’e mak Presidente KI Otelio Ote, Diretor Executivo KI, Diretor Rekursu Umanu KI, Diretor Média LABEH, Presidente Média SAPNews Clementino Bragança Machado, Diretor SAPNews Sèrgio Alves Da Costa, família sira no jornalista sira.
Jornalista : Marciana Da Conceição & Dircia Baptista Belo