Imajem : Presidente Repúblika Jose Ramos Horta hasoru malu ho investidor internasional sira iha Beijing-Xina. Foto : Media PR
SAPNewsTL, Dili – Prezidente Repúblika, José Ramos-Horta lidera fórum emprezariál ida iha Beijing, objetivu husi forum ne’e hodi hametin relasaun ekonómiku ho Nasaun Xina.
Eventu ne’e organiza hosi responsável prinsipál timoroan sira inklui Vise-Primeiru-Ministru no Ministru Asuntu Ekonómiku, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas no Embaixadór Timor-Leste nian iha Xina.
Fórum refere destaka relasaun metin entre nasaun rua durante tinan 22, Xina nia signifikadu nu’udar poténsia globál no rejionál.
Prezidente Ramos-Horta subliña nesesidade ba governu atu atua lalais hodi hadi’a kondisaun sira ba investimentu nian, liuliu iha dezenvolvimentu lei sira ba protesaun investimentu nian ne’ebé maka’as.
“Interese investidór nian aas, ministériu relevante sira Timor-Leste nian tenke akompaña ho asaun konkretu sira, inklui rezolve preokupasaun sira kona-ba dupla tributasaun ne’ebé levanta hosi investidór potensiál sira”. Sublinha Presidente Repúblika José Ramos Horta iha Beijing, 30/07/2024
Iha eventu ne’e, aprezenta oportunidade investimentu oioin iha Timor-Leste ba negósiu xinés sira, ne’ebé kobre setór sira hanesan infraestrutura, agrikultura, no turizmu.
Delegasaun timoroan subliña lokalizasaun estratéjiku nasaun nian, forsa traballu joven, no rekursu naturál hanesan vantajen prinsipál ba investidór potensiál sira. Partisipante Xinés sira hatudu interese partikulár ba Timor-Leste nia planu ba diversifikasaun ekonómika no dezenvolvimentu sustentável.
Vizita loron tolu ne’e hein atu fó rezultadu importante sira, ho asinatura akordu xave sira kona-ba Inisiativa Sinturun no Estrada, servisu aéreu, agrikultura, no kooperasaun iha área komunikasaun sosiál nian.
Vizita ne’e marka pasu signifikativu ida iha Timor-Leste nia esforsu atu hametin ninia relasaun internasionál no subliña importánsia husi relasaun Timor-Leste ho Xina ne’ebé buras ba beibeik.
Jornalista: João Marito