Imajem : Autor bolu feto “asu oan-nurak”. iha Servisu STAE Munisípiu Dili,03/02/2025. Foto : Vítima
SAPNewsTL, Dili : Iha loron 03 fulan Fevereiru 2025, inisial CSMS ba atualiza resensiamentu biométriku iha Resenseamentu Sekretariadu Tékniku Administrasaun Eleitoral (STAE) ne’ebé sentraliza sira nia servisu iha autoridade munisípiu Dili maibé funsionáriu balun familiariza sira nia servisu hodi bolu deit família no halo diskriminasaun ba kliente sira seluk ne’ebé laiha familia iha laran.
Wainhira sidadaun feto ho inisial CSMS ba forma naruk iha Servisu STAE Munisípiu Dili hodi renova ninia kartaun eleitoral maibe to’o iha fatin ne’e funsionáriu sira familiariza atendimentu hodi bolu deit ema ne’ebé kunhese no família.
“Ami ba hahú forma iha tuku lima madrugada, ami ba hein, hafoin to’o tuku 8 liu minutu tolunulu mak funsionáriu sira ba loke, ami forma naruk no hein to’o loraik maibé mosu familiarismu hodi bolu deit ema balun ne’ebé kunhese”. Tenik inisial CSMS ba SAPNews iha Dili,03/02/2025
Tanba mosu ona familiarismu no halo diskriminasaun maka inisial CSMS halo krítika ba aktu nepotizmu ne’ebé mosu iha instituisaun públiku estadu nian maibé pessoal seguransa mane ida hatan ho lia kroat katak “asu oan-nurak”.
“Wainhira, ha’u halo krítika no lamenta ba asaun ne’e, pessoal seguransa iha notariadu munisípiu Dili dehan ba ha’u katak ‘ha’u mak asu oan-nurak’, ha’u sente triste teb-tebes ho linguagem ida ne’e, tuir mai nia kontinua ko’alia makaas hodi taka odamatan ba ha’u”.Nia konta
Tuir vídeo ne’ebé vítima envia ba Jornalista SAPNews hatudu katak, funsionáriu balun halo nepotismu, iha ne’ebé bolu ninia família, CSMS dehan “labele hanesan ne’e, ne’e ladiak, bolu malu família ne’e, iha ne’e instituisaun públiku”. Pessoal Seguransa Sivil hatan hodi dehan “haree oras, tékniku dehan labele ona no taka ona, la atende ona, o hanoin ha’u mós gosta hatama ema karik, o labele dehan família no família iha ha’u nia oin”. Inisial CSMS hatan katak “Taka odamatan maibé ita boot nafatin simu ema ne’e, faru mutin ne’ebá bolu ninia ema tama ba ne’e”.
Tuir mai, pessoal seguransa sivil ne’e dehan, “O hanesan asu oan-nurak”. CSMS dehan tan, “Ami kumpri hela regra no husu atu halo atendimentu ho lolos maibé bolu ami asu oan-nurak, depois taka odamatan halo makaas ba kliente sira”. Situasaun ne’e akontese iha loron 03/02/2025 iha STAE Munisípiu Dili.
Tuir observasaun vítima iha STAE Munisípiu Dili katak funsionáriu sira tama iha oras 08:30, deskansa iha 10:56 minutus, hafoin loke hikas iha tuku 14:00 taka iha 16:18 loraik. Hafoin unforma katak taka ona maka funsionáriu balun bolu ninia família tama ba laran hodi aktualiza ninia kartaun eleitoral. Iha biban ne’e maka mosu dezentendimentu entre kliente no pessoal seguransa sivil.
Wainhira situasaun ne’e mosu, funsionáriu ne’ebé bolu deit ninia família nonok no la preokupa ho dezentendimentu refere.
Hafoin notísia ne’e publika, SAPNews tenta atu halo komfirmasaun ho Diretor STAE Munisípiu Dili no Diretor STAE Nasionál maibé seidauk konsege tanba sei okupadu ho servisu seluk.
Nune’e, SAPNews sei kontinua halo esforsu hodi halo komfirmasaun ho parte relevante sira kona ba akontesimentu ne’e tanba aktu refere kontra valor direitos humanos no prátika asédiu sexual hasoru feto sira iha instituisaun públiku sira.
Jornalista : Sergio Delekuar