Imajem : Jogador Paulo Domingos Gali da Costa Freitas. Foto : Social Media
SAPNewsTL : Jogador timoroan Paulo Domingos Gali da Costa Freitas (Gali Freitas) liu hosi nia ID Facebook ofisial deklara sai hosi Klube PSIS Semarang no fo obrigadu ba klube refere ba memória furak sira.
Marciana da Conceição – SAPNews
“Ohin, ha’u sai hosi klube furak ida. Klube boot liu iha Java Sentrál, klube ida ne’ebé iha istória naruk iha Indonézia. Wainhira laiha ema ida mak fiar ha’u, patraun yoyok sukawi ho liman nakloke prontu fo nia konfiansa mai ha’u atu bele iha kareira iha klube boot ida ne’e liu husi Eessy Enterprises Agency”. Hakerek Jogador Gali Freitas liu hosi nia konta Facebook iha loron, 26/05/2025
Gali Freitas sublinha, “Tinan 2, ha’u fo ha’u nia fuan no laran tomak ba sidade Semarang no klubu PSIS FC Official. Ohin ha’u nia loron ikus iha sidade ida-ne’e, sidade ne’ebé ha’u konsidera hanesan ha’u nia uma rasik. Ha’u hetan família foun barak iha sidade ida-ne’e.
“Ha’u odiu sentimentu atu dehan adeus ba PSIS FC Official no ha’u nia família foun iha sidade ida-ne’e, maibé ida-ne’e maka mundu loloos moris nian iha ambiente futeból nian”.Gali hakerek
Gali Freitas
Jogador timoroan ne’e fo agradese ba ema hotu iha PSIS Semarang tanba durante tinan 2 marka memória furak barak.
“Obrigado ba xefe Yoyok Sukawi no treinador sira hotu, ofisiál sira, no funsionáriu sira ne’ebé maka hamutuk ho ha’u durante tinan 2, Obrigadu ba memória sira”.
“Ha’u hadomi tebes ó, ó sei sai nafatin parte ida husi ha’u nia moris PSIS. Hamriik lalais PSIS FC Official no fila fali ba Liga 1, iha ne’ebé ita-boot pertense, la’ós iha Liga 2”.
Hafoin, deklara sai hosi Klube PSIS Semarang iha Indonésia, PSIS mos seidauk iha publikasaun ofisial kona ba desizaun refere. To’o oras ne’e seidauk iha desizaun seluk ba Gali Freitas hodi tama fali ba klube seluk.