Imajem : Xefe Suku Com Sergio Cristovão iha nia knaar fatin Com, Tutuala,18/11/2024. Foto : Dircia Baptista Belo
SAPNewsTL, Lautém — Laiha solusaun ba hadia konflitu, tinan 10 ona sítiu turistiku Garden Beach Ressort ne’ebe lokaliza iha Suku Com, Postu Administrativu Lautém Municipiu Lautém sai abandonadu no la hetan vizita husi vizitante sira.
Tuir Komunidade Suku Com Olegario da Costa hateten, suku Com iha poténsia ba area turismu sira nakonu ho nia paisajen ne’ebe furak, maibé desde sidadaun Australianu sira investe iha tinan 10 ba kotuk ate agora, seidauk dezenvolve fila fali, tanba na’in ba area refere hamosu konflitu ho maluk investor sira.
“Ita haree fatin Com Garden Beach Ressort abandona kuaze tinan 10 ona tanba uluk malae Australia sira investe iha ne’e, depois halo kontratu ho rai na’in iha ne’e, maibé tempu ne’eba kuandu fila tiha entrega ba rai nain, entaun rain nain sira iha konflitu maka abandona tiha area ne’e to’o agora seidauk rezolve”. Dehan Olegario da Costa, ba Jornalista sira, Segunda, (18/12/2024)
Fatin Com Beach Ressort daudaun ne’e parte autoridade lokal hamutuk ho komunidade sira diskute hamutuk, oinsa koopera ho na’in ba area refere hodi bele dezenvolve fila fali eko-turizmu Garden Beach Ressort.
“Ami ko’alia beibeik ona, oinsa para autoridade lokal sira tenke halo asaun ruma, atu reativa fali, eko-turizmu ida ne’e, halo aprosimasaun entre família ida ba família seluk, sira simu malu nune’e bele reativia fila fali, fatin ida ne’e hodi dada vizitante sira, tanba ita haree fatin balu la’o diak hela, maibe husi komunidade iha Suku Com ne’e rasik, presiza iha kontribuisaun diak atu oinsa simu ema sira ne’ebe hakarak atu vizita fatin turista ida ne’e”.Nia sublinha
Komunidade ne’e fundamenta, dalan ba dezenvolve sitiu turistiku Garden Beach Ressort presiza kooperasaun diak entre komunidade, autoridade lokal no Ministériu Turismu nio Ambiente, oinsa mellora sitiu ne’e iha futuru ho diak.
Nia akresenta, kompara ho tinan hirak liu ba kotuk ne’e kada loron Com Beach Ressort sempre hetan vizita husi turista domestika no estranjeiru sira, maibé agora fatin refere menus vizitante sira.
“Kompara ho uluk, Com Beach Ressort ne’e sei diak vizitante sira ne’e mai barak los, maibé agora ne’e la la’o ona entaun vizitante menus ona, dala ruma husi Timoroan mak mai Vizita, maibé hanesan turista husi estranjeiru ne’e ladun mai ona”.Nia informa
Imajem : Representante komunidade Olegario da Costa
Representante komunidade ne’e sujere ba parte Governu liu husi Ministeriu Turizmu no ambiente atu serbisu hamutuk ho autoridade lokal Munisipiu Lautém hamosu ideologia polítika kria paz entre komunidade sira, nune’e bele fo espasu ba dezenvolvimentu area turizmu Com Beach Ressort.
“Sujere ba Governu liu-husi Ministeriu Turizmu no ambiente atu haree servisu hamutuk ho autoridade lokal sira iha Lautem hodi bele rezolve problema ne’e, nune’e ba oin bele reativa fali ba fatin Com Beach Ressort”. Nia husu
Xefe Suku Com Sergio Cristovão akresenta, iha 2002 komunidade Suku Com serbisu hamutuk ho autoridade lokal dezenvolve sitiu turistiku Garden Beach Ressort no hetan invetimentu husi sidadaun estranjeiru ida, maibé hafoin sidadaun Australianu ne’e fila ba nia rai, iha tinan 2014 mosu dezentedementu implika ba movimentasaun vizitante sira nian.
“Komesa ona hari’i Com Beach Ressort, malae ne’e mai halo Jestaun didiak ema servisu kuaze ruanulu liu to’o 2014, Malae ne’e husik iha 2013, entaun jestor sira trota malu Timor oan sira kaer ne’e mak mosu dezentedementu la diak tanba ne’e mak hodi paradu hotu to’o agora”. Xefe Suku konta
Autoridade lokal ne’e kompremetidu sei enkuadra komunidade sira ne’ebe hamosu konflitu refere hodi kria fila fali estabilidade entre komunidade sira, nune’e ba futuru sítiu turístiku Garden Beach Ressort bele dezenvolvidu.
Notísia ne’e Imprensa SAPNews foti liu hosi programa Timor-Leste Press Union (TLPU) ne’ebé ba hala’o kobertura iha Postu Administrativu Tutuala, Munisípiu Lautém durante loron rua (19-20/11/2024).
Jornalista : Dircia Baptista Belo