Imagem : Asina akordu entre Komisaun Jogu CPLP & Presidente RTTL,E.P iha CCD,07/07/2025.
SAPNewsTL, Dili: Governu liu husi komisaun organizador fo konfiansa ba RTTL, E.P halo transmisaun direita ba jogu CPLP 2025 iha Timor-Leste durante loron sanulu nian laran.
“Razaun ita hili RTTL, E.P tanba empreza hetan finansiamentu husi estadu, RTTL, E.P mos iha esperiensia ona, oinsa halo jestaun ba media center hodi kanaliza output ba media sira seluk tanba ne’e ita hili RTTL, E.P halo transmisaun direita ba jogu CPLP 2025 iha Timor-Leste durante loron sanulu nian laran”.Dehan Koordenador komisaun organizador jogu CPLP 2025 Jorge Cristovão ba jornalista sira iha CCD, Merkadu Lama, Dili segunda (07/07/2025).
Koordenador hatutan, akordu ida ne’e deskrita ho orsamentu oituan para atu fasilita fasilidade balun RTTL, E.P atu halo kompletu liu tan, Governu aloka orsamentu 50.000 USD ba RTTL, E.P halo transmisaun direita ba jogu CPLP 2025 iha Timor-Leste, antes ne’e ekipa tékniku sira halo ona servisu tekniku nian iha kampu sira, ohin formaliza deit ba asina akordu entre parte rua.
Iha fatin hanesan, Prezidente RTTL, EP Elizeu Veloso hatete, Ohin RTTL, EP hetan konfiansa husi governu liu husi komisaun organizador hodi halo transmisaun direita ba jogu CPLP 2025 iha Timor-Leste teknikamente RTTL, E.P prontu ona ho pursentu 100.
“Ohin, ita hetan konfiansa husi governu liu husi komisaun organizador hodi halo transmisaun direita ba jogu CPLP 2025 iha Timor-Leste, teknikamente ita prontu ona ho pursentu 100 hodi fo sai transmisaun direita jogu modalidade ualu iha jogu CPLP 2025, durante loron sanulu nia laran” tenik Prezidente
Prezidente infroma tan, RTTL, EP mos sei fo sai output ba media sira hotu hanesan media nasional no internasional sira atu ema hotu bele asiste jogu ne’e, RTTL, EP halo ona try out durante loron tolu ba jogu divizaun dahuluk Liga Timorense akompana husi tekniku internasional sira hodi prepara ba jogu CPLP nian, nune’e sira fo oportunidade ba hare’e nain sira para bele fo sujestaun ba sira nia transmisaun para hadia diak liu tan antes tama ba jogu CPLP.
Elizeu salienta tan, kamera RTTL, EP utiliza iha jogu CPLP modalidade futebol sei uza kamera 12 para hatudu kapasidade RTTL, E.P nian, kestaun orariu jogu tanba ne’e jogu balun RTTL, EP sei halo tranmisaun direita no balun sei halo gravasaun deit.
Jogu CPLP sei kompostu hosi tenis kampu, karate, taekwondo, futebol, xadres, Basketball, voleibol no atleta paralímpiku.
Jogu refere sei hahu iha loron 17-27 fulan jullu tinan 2025, iha ne’ebe sei hala’o iha estadium munispal Díli, Jinaziu Desportu Díli, Kampu Tenis Liseu, Kampu Voleibol Praia Lecidere, kampu basketebol MUDAM & Kampu Futebol Bekora.