Governu Fo Oportunidade Ema Hotu Asiste Jogu CPLP

Imajem : Timoroan asiste jogu CPLP iha Estádiu Munisipal Dili, 19/07/2025. Foto : Marciana da Conceição

SAPNewsTL, Dili: Governu liu husi MJDAC nu’udar komisaun organizador fo oportunidade ba povu Timor-Leste hodi asiste abertura jogu CPLP 2025 iha Estadium Munisipal Dili.

Augusto dos Santos – SAP News TL

“Ita fo oportunidade ba públiku hotu-hotu, orsida partisipa serimonian abertura jogu CPLP 2025 iha Estadium Munisipal Dili maibe ita nia kondisaun no kapasidade estadium mak kiik tanba ne’e la to’o atu akumula ema hotu iha laran, maibe ita tau layar rua iha sorin karuk no los atu ema bele asiste abertura ne’e”, dehan ministru juventude desportu arte kultura Nelyo Isac Sarmento ba jornalista sira iha CDD Merkadu Lama, Dili sabadu, (19/07/2025).

Ministru hatutan, Iha estadium laran iha tribun prinsipal ba ema bainaka sira, iha mos tribun públiku sira maibe tanba fatin minimu iha estadium, se mak lais liu nia maka hetan fatin, Bainhira iha parte seguransa no komisaun dehan fatin nakonu ona sei taka odamatan hotu, karik ba hirak ne’ebe hakarak asesu sei hare’e deit iha CDD tanba iha live streaming ba jogu abertura.

Nia informa tan, kona-ba abertuta jogu CPLP nian ita muda oras tanba konvidadu balun orsida loraik maka to’o iha Timor-Leste, abertura ba jogu sei hahu iha tuku 06:00 oras Timor-Leste nian.

Nasaun sira ne’ebe orsida partsipa abertura ne’e maka reprezentante husi atleta sira hosi kada nasaun. To’o oras ne’e delegasaun hosi Portugal mak estadia ona iha Dili hodi partisipa jogu abertura.