Imajem : Delio Mouzinho treinu iha Hotel Ventura Lecidere,15/01/2025.
SAPNewsTL, Dili – Boksista Timoroan Delio Anzaqueci Mouzinho preparadu hodi sa’e ring hasoru Alisher iha Bali, Indonésia. Boxista ne’e mós husu apoia orasaun no finanseira hodi fasilita ninia preparasaun ba eventu internasionál ne’e tanba governu lada’uk apoia maximu.
Délio Mouzinho hateten hahú tama iha mundu boxing iha Lospalos, tinan 2019 liu husi Treinador Elizário Dias Monteiro, tuir mai kontinua treina an no hadia ninia talentu, tama iha kompetisaun internasionál sira to’o ohin loron.
“Experiénsia kona-ba kompetisaun mak primeiru tuir iha Vietname tinan 2022, tuir fali Asian Games iha Dubai, Austrália, Cambódia, China. Experiénsia ne’ebé hetan la hanesan ho ema nasaun seluk maibe primeira vez tuir kompetisaun boxing iha Vietname sai segundu lugar, joga iha Canberra lakon ho point, joga fali iha Sidney manan, joga fali iha Cambodia hetan terseiru lugar, hetan medalha osan mutin ida ho metan ida.”Dehan Delio Mouzinho ba jornalista SAPNews iha Hotel Ventura Lecidere,15/01/2025.
Ligadu ho preparasaun ba eventu Atlas Super Club Bali, Délio deklara sei hatudu jogu diak no halo buat ne’ebé Timoroan sira hein no hakarak.
“Atu hamonu nia iha ronde primeiru ka menan, ita labele deside tanba ema ho nasaun ne’ebe dezenvolvidu no atleta ne’ebe barak, sira mós iha try out barak, tanba ita iha timor ema ne’ebe atu koko ho ita laiha no la ajuda ita”.
“Ha’u nia forsa to’o iha ne’ebe seida’uk hatene maibe fiar an katak sei halo buat ruma ba boxista ne’ebé ha’u sei hasoru, ha’u sei aplika matenek no konhesimentu ne’ebe aprende durante ne’e ho diak hodi hatudu ba ema katak ita Timor oan mós bele”.
Délio husu ba makaer ukun no Timoroan sira hodi apoia finanseiru, nune’e bele ajuda ninia treinamentu durante atividade preparasaun to’o realizasaun internasionál sira.
“Ha’u husu Timoroan sira, ajuda ha’u iha parte orasaun no finanseiru ne’ebe sei menus, problema ne’ebe hasoru laiha ema ida maka ajuda, ha’u husu bebeik ba governu maibe governu la hatan ba preokupasaun sira no la ajuda to’o agora, husu ba maluk sira ne’ebe iha rai-laran no rai-liur, karik iha nasionalismu no patriotismu bele apoiu no buka dalan atu bele ajuda malu”. Délio husu
“Durante ne’e ba joga boxing profesional iha ema nia nasaun maibe ami husu bebeik ba governu laiha ema atu ajuda ami, maibe fiar katak Timoroan ne’ebe buka moris iha ema nia rain, ita bele fo fuan ba malu hodi ajuda malu, imi nia apoiu ho orasaun no finanseiru, ami sei la halo imi desanimadu (kecewa), ami sei halo imi kontenti no lori timor nia naran”.
Boxista ne’e sublinha joven labele lakon vontade hodi dezenvolve ninia talentu maibé kontinua hola parte iha mundu desportu, nune’e bele lori imajem Timor nian ba mundu.
“Governu presiza tulun, nune’e motiva joven sira atu labele lakon vontade, labele husik sira nia talentu ba mete problema ne’e ladun diak. Timor ne’e tenki halo desportu ne’ebe barak atu joven sira bele konhese malu no amizade diak liutan inklui lori Timor nia naran ba oin”.
“Durante ne’e governu la apoiu, ami lori Timor nia naran ba boxing iha ema nia nasaun, hetan klasifikasaun dala barak ona maibe laiha governu ida atu ajuda ami, fiar katak sei halo mudansa loron ida sei ajuda ami”.
“Hetan klasifikasaun no medalha mai fo ba governu, sira hatene hela maibe finji la hatene, rona maibe finji la rona. sira fo karta apresiasaun deit maibe la rekohnse no la tau atleta sira nia fatin, husik joven sira livre ba ne’ebe deit. Timor husik joven sira la’o livre no buka rasik, governu presiza tau atleta nia fatin atu ba kompete ho nasaun seluk”.
Délio dehan wainhira governu rekunhese no fo subsídiu kada fulan mak atleta sira sei dezenvolve an diak liután no hatudu prestasaun diak iha futuru.
“Agora, imi seidauk rekonhese ami, maibé to’o tempu bele rekunhese, se agora la apoia mós ami sempre esforsu hodi hetan klasifikasaun, sa tán imi apoia, tau ami nia fatin, subsídiu ba ami fula-fulan, ami sei hein tan saida, agora ami voluntáriu fo ami nia isin ba ema tuku maibe ami sei forsa nafatin, ami lori timor nia naran”.Nia sublinha
Eventu internasionál Atlas Super Star Club ne’e sei hala’o iha Bali, loron 9 fulan Fevereiru 2025, Délio Mouzinho oras ne’e kontinua prepara an hodi sa’e ring hasoru boxista Alisher hosi nasaun Uzbekistan.
Jornalista : Ermelinda Soares & Marciana da Conceição