Imajem : Graduadu Crisanto Lucas Lafu iha Jardim City 8 Dili, 12/07/2024
SAPNewsTL, Dili – Lisensiadu Crisanto Lucas Lafu sente kontente tebes tanba bele atinji ona mehi ne’ebe esforsu no hein durante tinan 7 iha Universidade Nasional Timor Lorosa’e (UNTL) Fakuldade Filosofia e Siensia Humanas.
Lisensiadu Crisanto Lucas Lafu ho laran haksolok no fo agradese ba Na’i Maromak no familia hot-hotu tanba bele alkansa ona objetivu iha mundu akadémiku.
“Ha’u sente kontente, laran ksolok no orgullu tanba bele atinji mehi ne’ebe mak durante ne’e esforsu, tan ne’e ha’u agradese ba Aman Maromak, no mos ha’u nia inan aman no familia sira hotu mak suporta ha’u no ohin bele finaliza ha’u nia estudu”. Tenik Lisensiadu Crisanto Lucas Lafu ba SAPNewsTL, Sexta-Feira, 12 /07/ 2024.
Crisanto Lucas Lafu akresenta, molok susesu iha UNTL atravesa dejafiu barak, dala barak laiha osan hodi fasilita estudu tanba inan aman moris hanesan ema agrikultor, dosente fo traballu barak no inklui nesesidade lor-loron ne’ebe senpre hetan kuran tanba ekonomia familia mihis, maibe nu’udar oan mane ida senti iha responsabilidade hodi pasiénsia, haka’as aan no orasaun beibeik to’o hetan graduasaun.
“Durante tinan hitu (7) nia laran kada vez husu Osan ba Inan Aman, dala ruma osan laiha tanba hau nia aman inan moris nu’udar Agrikultor, situasaun ne’e dala ruma halo ita triste tanba osan husi aman la sufisiente mai ha’u atu hala’o estudu”.
“Dezafiu ne’ebe mak iha banku estudu nia laran mak dosente sira senpre fo traballu barak maibe ha’u esforsu no pasiensia to’o ohin loron bele realiza mehi sai realidade”.
Crisanto hatutan, iha prosesu estudu ne’ebe kleur no enfrenta dejafiu oioin, nia senpre kaer segredu pasiénsia no orasaun, husi pasiénsia no orasaun bele ultrapasa dejafiu no difikuldade hotu ho susesu.
“Segredu ne’ebe mak ha’u kaer durante ne’e hodi tahan to’o ohin loron mak ha’u nia pasiensia no orasaun ne’ebe nunka para, tanba buat hotu presiza ita nia Pasiensia, wainhira ita pasiénsia ita see manan buat hotu ne’ebe ita hakarak atinji liliu bele konkista ita nia mehi”. Nia deklara
Imajem : Lisensiadu Crisanto Lucas Lafu
Graduadu ne’e afirma, nia parte sei dezenvolve diak liu tan nia kunhesimentu no kapasidade liu husi kursu, formasaun no treinamentu sira liga ba formasaun iha futuru.
“Ha’u sei haklean ha’u nia kunhesimentu liu husi kursu, formasaun, no treinamentu liga ho area Filosofia, hafoin ha’u sei dezenvolve, servi no kontribui ba sosiedade liu husi Aldeia, Suku, Postu Administrativu no Munisipiu no Dezenvolvimentu Nasional”. Crisanto afirma
Liga ba kampu traballu ne’ebe sei menuz, graduadu ne’e konsidera graduadu sira presiza hatudu sira nia kunhesimentu no kapasidade ba públiku, nune’e públiku bele hatene tanba kampu traballu laiha ne’e responsabilidade entidade hotu nian iha Timor-Leste.
“Kada tinan universidade produz graduadu barak maibe maioria la hetan servisu, ne’e tuir ida-idak ninia karakter mak ladun hatudu nia kunesimentu ba públiku, karik ita la hatudu ita nia kunesimentu no karakter ba públiku susar tebes atu ema kunhese no hetan servisu, tanba ita mos falta kampu de traballu”. Nia dehan
Graduadu ne’e husu ba estudante sira ne’ebe sei hala’o estudu iha universidade, atu kontinua hatudu pasiénsia maxima no orasaun beibeik inklui hakaas nafatin to’o hetan susesu tanba susesu ne’e presiza esforsu no dedikasaun.
“Ha’u nia mensajen ba maluk estudante sira hotu ne’ebe sei enfrenta hela estudu iha universidade tenki esforsu an nafatin, boa vontade, hatudu pasiénsia no orasaun hodi duni ita nia mehi, se ita laiha vontade, ita la pasiensia, la esforsu an ita sei la atinje ita nia mehi”. Nia hakotu
Iha tinan ne’e, UNTL gradua graduadu hamutuk rihun ida atus hitu ruanulu resin ualu (1728) husi Fakulade Sanulu iha UNTL, Graduasaun ne’e hala’o durante loron rua iha Gináziu Munisipal de Dili (GMT).
Jornalista : Ariqui Crisanto Colo