Habemus Papam Leão XIV !  Robert : “Iha Ida De’it, Ita Ida De’it”

SAPNewsTL: Rezultadu konklave iha loron daruak parte loraik hatudu katak Kardeál Robert Francis Prevost mak hetan votu maioria husi kardeál na’in 133, rezultadu ne’e amostra kardeál Robert Prevost hili nu’udar Susesór Saun Pedro nian, ne’ebé bolu Papa Leo XIV husi Kongregasaun Agustinianu.

Rezultadu eleisaun datoluk iha loron daruak oras lokraik (08/05/2025), hatudu suar mutin ida ne’ebé hetan Pontífise Romanu foun maka Papa Leão XIV, nu’udar Vigáriu Kristu, Susesór Saun Pedro nian.

Hafoin eleitu, Papa Leão XIV sai hosi Kapela Sistina hodi hatudu an, komprimenta no fo bensa “Urbi et Orbi” ba sarani barak ne’ebe halibur iha Prasa Saun Pedro no ema hotu iha mundu rai-klaran.

“Mai ita hotu agradese ba Maromak tanba hili no fihir ona Papa Leão XIV ne’ebe prontu ona hodi hatán ba Igreja no unanimidade tomak nia interesse.” Vatikanu, 08/05/2025

Robert Prevost hili sai Papa Leão XIV ba dala 267° ne’ebe mai hosi Estadus Unidus Amérika. Papa Leão XIV uluk hanesan Bispu Eméritu Chiclayo nian iha Peru, no Kardeál Kúria Romana Igreja Katólika nian.

Robert Prevost hetan nomeasaun nu’udar Prefeitu Dikastériu nian ba Bispu sira iha Janeiru 2023 no troka nia antesesór, Kardeál Marc Ouellet, iha Abril 2023, hafoin sai Papa Leão XIV iha tinan 2025 hosi Kardeál 133 ne’ebe mai hosi nasaun hitunulu resin ida (71) no Kontinente lima (5).

Jornada Papa Leão XIV

Amu-Papa Leão XIV, ninia naran kompletu maka Robert Francisco Prevost, moris iha Amérika iha loron 14 fulan-Setembru tinan 1955. Robert Prevost sai nu’udar padre iha tinan 1982 hosi Kongregasaun Agostinianu, hafoin hetan nomeasaun nu’udar bispu iha tinan 2014.

Robert Prevost moris iha família ida ne’ebé iha hun husi Fransa, Itália, no España. Robert remata nia estudu sekundáriu iha semináriu ki’ik husi Ordem Santo Agostinho nian. Iha tinan 1977, nia hetan grau Lisensiatura iha Siénsia kona-ba Matemátika husi Universidade Villanova.

Robert Prevost tama ba Ordem Santo Agostinho nian iha fulan-Setembru tinan 1977, halo nia votu dahuluk iha tinan 1978 no votu perpétua iha tinan 1981. Nia hetan grau Mestre iha Divinidade husi Catholic Theological Union iha Chicago iha tinan 1982 no ordenadu sai amu-lulik iha loron 19 fulan-Juñu tinan 1982. Hafoin, niia nasci kursu doutoramentu iha Direitu Kanóniku husi Pontifícia Universidade Santo Tomás de Aquino iha Roma.

Robert serbisu iha Peru hosi tinan 1985 to’o 1986 no hosi tinan 1988 to’o 1998 nu’udar padre pároku, ofisiál diosezanu, profesór semináriu, no administradór. Nia pasa tinan sira 1987 to’o 1988 no 1998 to’o 2001 iha Estadus Unidus, bazeia iha Chicago no serbisu iha orden agostinianu.

Iha tinan 1999, Robert Prevost eleitu nu’udar Prior Provinsiál ba Agustinianu sira iha Chicago. Robert hala’o mandatu rua nu’udar Prior Jerál ba ordem Agustinianu mundiál nian husi tinan 2001 to’o 2013.

Papa Francisco nomeia Prevost nu’udar Administradór Apostóliku ba Diocese Chiclayo, Perú, iha tinan 2014, no Bispu iha tinan 2015. Nia lema episkopál mak “In Illo uno unum” (“Iha Ida de’it, ita ida de’it”), ne’ebé reflete nia espiritualidade Agostinho nian.

Iha tinan 2023, Papa Francisco nomeia Robert Prevost nu’udar Prefetu ba Dikastériu ba Bispu sira no Prezidente ba Komisaun Pontifícia ba Amérika Latina. Iha knaar ne’e, nia superviziona selesaun ba bispu foun sira iha mundu tomak.

Iha loron 8 fulan-Maiu tinan 2025, Kardinál Robert Francis Prevost eleitu nu’udar Papa, hodi foti naran Leo XIV. Nia mak Papa dahuluk husi Estadus Unidus no dalawa husi Emisfériu Osidentál.

Papa Leão XIV ko’alia lian barak hanesan inglés, españól, italianu, francés, portugés, latín no alemán.

Durante tinan 9, Robert Prevost serbisu nu’udar bispu iha Peru, hafoin Papa Francisco hili nia nu’udar kardeál iha loron 30 fulan-setembru tinan 2023.

Liu tiha tinan rua (2023-2025), kardeál Robert Francis Prevost eleitu nu’udar Papa Leão XIV, Susesór Saun Pedro nian, ho tinan 70, iha loron 8 fulan-Maiu tinan 2025.

Jornalista: Marciana da Conceição